نادية مصطفى عن إعادة عمرو مصطفى لأعمال أم كلثوم بالذكاء الاصطناعي: إزاي نخليها تغني وهي مختارتش ده؟!
كشفت الفنانة نادية مصطفى رأيها في إعادة تقديم الملحن عمرو مصطفى أغاني كوكب الشرق أم كلثوم، عن طريق الذكاء الاصطناعي، مؤكدة أن هذا الأمر إساءة كبيرة.
نادية مصطفى: أغنية أم كلثوم بالذكاء الاصطناعي ينقصها الروح
وأشارت الفنانة نادية مصطفى في حوارها مع القاهرة 24، إلى أن هناك علاقة صداقة بينها وبين الملحن عمرو مصطفى، معربة عن حبها الشديد له، معلقة: أنا مش ضد التكنولوجيا خالص ولا ضد عمرو مصطفى لأنه دايما عنده طاقة التجديد، وأنا بحبه كملحن وكإنسان.
وعن فكرة تقديم عمرو مصطفى أعمال أم كلثوم بالذكاء الاصطناعي، قالت نادية مصطفى: تجربة عمرو مصطفى في إعادة تقديم أغاني أم كلثوم بالذكاء الاصطناعي يعتبر إساءة ليا شخصيًا لأن أم كلثوم قامة كبيرة، ومش بس عندي دا عن الوطن العربي كله، وكوكب الشرق كانت بتتميز بـ اختيارها لـ كلمات أغانيها وألحانها، وهي ماختارتش تغني ده.
وتابعت نادية مصطفى: لما سمعت الأغنية حسيت أن مفيهاش روح أم كلثوم الحقيقة، وموضوع الذكاء الاصطناعي ده هيقعد الناس كلها في البيت سواء ملحن أو مؤلف، كدا احنا بنلغي البشرية، ولازم يوم عندنا وعي بالأزمة دي، ونكون ضد أي تكنولوجيا تسبب ضرر للبشر.
سامحوه عشان خاطري.. نادية مصطفى تعلق على أزمة تصريحات محمد فؤاد
في سياق مختلف، علقت الفنانة نادية مصطفى، عضو نقابة المهن الموسيقية، على أزمة تصريحات الفنان محمد فؤاد، والتي قالها مؤخرًا في حفله بالمملكة العربية السعودية.
وقالت نادية مصطفى في تصريحات لـ القاهرة 24: أحيانًا وإحنا واقفين على المسرح مش بنقدر كل حرف بنقوله، لكن بقول لكم الكاميرات ليها رهبة وأكيد ميقصدش كده، ومحمد مصري حتى النخاع، وله أخ استُشهد في حرب أكتوبر وبيحيي حفلات الرياسة، وشوفوا أيام الثورة إحساسه كان عامل إزاي.. راعوا ده.
