مدير أعمال شيرين عبد الوهاب يُعلن انفصاله عنها بشكل مفاجئ: قررنا نحط صداقتنا والعشرة قبل أي حاجة
فاجأ إيهاب صالح مدير أعمال شيرين عبد الوهاب، متابعيه وجمهور الفنانة بانفصاله عنها، بعد نجاح حفلها الأخير في جدة، إذ أشار إلى أنهما فضلا أن لا يؤثر العمل على صداقتهما، لذلك قرر ترك إدارة أعمالها.
وكتب إيهاب صالح تغريدة، عبر حسابه الشخصي بـ تويتر: جمهور شيرين العظيم الحمد لله على نجاح حفل جدة كما كان متوقع، وده العادي بتاع شيري في أي حفلة، أجلت الإعلان بالقرار ده لحد بعد الحفلة، وحابب أشكركم جدًا على كم الدعم الرهيب في خلال الفترة اللي فاتت ليها في المقام الأول، وطبعا بعد كدة ليا.
وأردف إيهاب صالح: قررنا إن من الأفضل لينا إن نحط صداقتنا والعشرة قبل أي حاجة، وإني أبتعد عن إدارة أعمالها، وده أكيد لمصلحة الطرفين ولينا أسبابنا، مبروك وشكرا يا شيري من كل قلبي ويا رب أكون كنت على قد وعدي وكلمتي ليكي، إني دايما في ضهرك والحمد لله الدنيا دارت من أول وجديد وتكسري الدنيا حفلة بعد حفلة، وخلاص أهو الألبوم على الأبواب، ومتأكد إنه هينجح نجاح غير عادي.
وأضاف إيهاب صالح: فرحان بشكل ملوش وصف بنجاحك، ورجوعك بالقوي دي وده اللي اتعودنا علية منك طول السنين دي، أنا كدة كدة دايما موجود زي مانتي عارفة، وربنا يديم كل اللي بينّا على خير، وآسف لو في أي لحظة كنت قصرت معاكي بأي شكل، أحب أشكر كمان جمهورك أكيد اللي مشوفتش منه غير كل خير وحب، شكرا بجد من كل قلبي، طبعا وأكيد شكر كبير لسيادة المستشار تركي آل الشيخ (أبو ناصر) على كم الدعم الكبير منه، بمجرد إنه شاف صورة رجوعك للاستوديو وقد إيه كان مهتم بشيرين، ومقدر قيمتك وتقديرك بشكل يليق بيكي صوت إحساس العرب وده مش غريب عليه، ودايما في ضهر كل الفنانين العرب كدة كدة، دي شهادة حق لازم تتقال.
واختتم إيهاب صالح: ربنا دايما يحبب فيكي خلقه، ويبعد عنك أي شر بكل أشكاله ويكتبلك السعادة، أتمنى التوفيق لمديرين الأعمال الجايين، وأدعمهم دايما بأي شكل أكيد عشان تفضلي دايما على القمة.
