بيحرمونا نقف مع الشباب.. هالة صدقي: لو جالي تكريم دور تاني برفض وبكون عاوزة أهزقهم وأهينهم
تحدثت الفنانة هالة صدقي، عن أزمة ترتيب الأسماء في تتر مسلسل جعفر العمدة الذي عرض ضمن المارثون الرمضاني الماضي، والذي أثار جدلًا لكتابة اسم أحمد داش بعد محمد رمضان مباشرة وقبل باقي الفنانات رغم صغر سنه.
وأكدت هالة صدقي في ندوة تكريمها في القاهرة 24، أن ترتيب الأسماء لم يتسبب في مشاكل مع فريق العمل، موضحة: كله مكتوب في العقد وكله معروف، وأحمد داش لأنه شاب جديد وصغير وخد مكان أعلى ده لفت الانتباه، ولكن المسلسل بيتكلم عن أب وابنه فهما دول الأساس، ولذلك أنا طلعت نفسي بره القايمة وسبت العيال يتخانقوا، وأنا في يوم من الأيام اسمي نزل قبل هدى سلطان فكنت مخضوضة، اللي هو أنا مين علشان اسمي ينزل قبلها، لكن هي دايرة الحياة.
لا أحب تصنيفي في الاستفتاءات دور تاني
وأضافت هالة صدقي: مهم نعطي الشباب فرصة، لكني لا أحب تصنيفي في الاستفتاءات دور تاني عيب، لأنهم بيحرمونا نقف مع الشباب، فمش معنى إني وقفت معاك أبقى دور تاني، ولذلك أنا أرفض لو جالي تكريم دور تاني، وبكون عاوزة أهزق اللي بيقول وأهينه لأنه مش فاهم.
وكشفت هالة صدقي حقيقة خلاف زينة مع بطلات العمل قائلة: هي حرة لو كانت واخدة جنب لوحدها لكن أنا والبنات كنا زي الفل حلوين وبنات جميلات وممثلات محترفات وملتزمات ومحترمات، وأحب أكرر معاهم تجربة الشغل مرة تانية.
وأشادت هالة صدقي بأداء بطلات العمل إذ قالت: إيمان العاصي لم تكن منورة بهذا الشكل من قبل، ومنة فضالي قدمت الكوميدي والتراجيدي في الوقت نفسه وقدمت مشاهد حلوة وعظيمة ومي كساب في الأساس مطربة وأول معرفتي بيها كانت هي وشيرين في بيروت، وقلت لها إنتي هتكوني نجمة كبيرة، وكان نفسي تركز في الغناء أكتر لأن موهبة الطرب لا توجد عند أي شخص وبشجعها باستمرار إنها تهتم بالطرب، وهي قدمت في جعفر العمدة دور من أروع ما يمكن وكانت جميلة وصادقة.
