مصطفى حشيش: مينفعش اتهزأ في دور لأني أستاذ جامعة.. وسي السيد في بيتي وأرفض عمل المرأة
حل الفنان مصطفى حشيش ضيفًا على الإعلامية ياسمين عز في برنامجها كلام الناس، المذاع على شاشة قناة mbc مصر، وأدلى بالعديد من التصريحات، ومنها سبب رفضه لبعض الأدوار التي تعرض عليها، إلى جانب حديثه عن زوجته.
مصطفى حشيش يكشف سبب رفضه لبعض الأدوار
وقال مصطفى حشيش: برفض أدوار كتير واختياراتي دقيقة، لإني ما ينفعش أطلع بشخصية اتهزأ فيها أو بتضرب، لإن ده قدام الطلبة بتوعي شيء مش لطيف، لذلك بنتقي أدواري، وفي النهاية لو أنا وظيفتي ممثل فقط هعمل كل الأدوار ولكني محكوم بإني أستاذ جامعة في الأساس.
وقال مصطفى حشيش، إن شخصيته مثل سي السيد في المنزل، موضحًا: أنا آسف للستات كلها أنا سي السيد في بيتي، لإن برضه الست الهانم بتاعت البيت، وأنا بقدر الست ومراتي اللي هي ست البيت وستي، بتملك كل شيء وأنا لا أملك شيء، وبيتي والفلوس وحتى عربيتي باسمها، هو فيه أكتر من كده احترام للست أو تقدير للست أو أمان للست، يا جماعة كل ما الست هتقدرك وهتشيلك فوق راسها، أنت طبيعي هتشيلها فوق راسك، وبالنسبة لي الست هي ست البيت وستي أنا كمان لإني من ضمن البيت.
مصطفى حشيش يرفض عمل المرأة
وكشف مصطفى حشيش وجهة نظره في عمل المرأة قائلًا: بشوف الحالة دي سلبية جدًا والمفروض الست المتجوزة تبطل شغل، وجوزها يجبرها على كده حتى لو هيعيشها على قد مرتبه، وأنا لما اتجوزت مراتي مقدمتش ليها مهر وما طلبتش منهم يجيبوا لي حاجة وقلت لهم عاوزها بشنطة هدومها علشان لما أجيب فازة وأنا بشتغل واتعصب عليها لما تيجي تنضف البيت وتنضف الفازة تعرف أنا قد إيه تعبت علشانها، لكن لو الفازوة جاية بسهولة هتكسرها، ولازم كل ست تعيش على قد دخل جوزها وما تشتغلش.
كما أكد مصطفى حشيش أنه من المستحيل أن يوافق على عمل ابنته في مجال التمثيل، قائلًا: ممنوع أخلي بنتي تمثل علشان شايف قد إيه الممثلين بيتعبوا وقد إيه متبهدلين في الشغلانة وبيسيبوا بيوتهم، لإننا بنقعد في الاستوديو عشرين ساعة فلو واحدة متجوزة وعندها عيال تسيب بيتها 20 ساعة، فأنا شايف الزملاء الفنانات متبهدلين في المهنة ودي بنتي وستي وتاج راسي وهي المتحكمة فيا ولإني بحبها بقول كده.
وأردف مصطفى حشيش: حاجتين محدش بيعملهم لي في البيت، رغم إني سي السيد، بحب أعمل لنفسي كوباية قهوة، لإني مليش كيف إلا في القهوة وماليش في السجاير ولا المياه الغازية ولا عمري شربت نقطة بيرة، وهو فنجان القهوة كيفي، وبحب أغسل شراباتي بنفسي، ومن كتر نظامي عارف كل حاجة في الدولاب ومراتي بتجيب لي الهدوم وتحطها على السرير وأنا بنظمها في الدولاب.
مصطفى حشيش يتحدث عن والديه
كما تحدث مصطفى حشيش عن والديه قائلًا: أبويا ميت سنة 1975 عن عمر 65 سنة، وأمي ميتة 2007 عن 93 سنة، ومن 75 حتى 2004 كانت كل جمعة تطلع هدوم والدي من الدولاب وتغسلهم وتخلي حد يكويهم وتستفهم في الدولاب بنفتالين لمدة 30 سنة، ولغاية ما كان فيها صحة بعد صلاة الجمعة لحد العشا تروح عند والدي في القبر بالرغم من إن المقابر عندنا بره البلد.
