فيها بلاوي سودة.. مصطفى كامل يكشف تفاصيل تقارير الجهاز المركزي للمحاسبات عن منير الوسيمي
أوضح الفنان مصطفى كامل نقيب المهن الموسيقية، أسباب تحويل الموسيقار منير الوسيمي نقيب المهن الموسيقية الأسبق للتحقيق، وأسباب فتح باب الترشح لمدة طويلة، في انتخابات اختيار نقيب جديد.
وأسباب فتح باب الترشح لمدة طويلة
قال مصطفى كامل خلال لقائه مع القاهرة 24: تجرى الانتخابات في معادها يوم 1 أغسطس، ويتم فتح باب الترشح يوم 11 يونيو، من أجل إعادة فرصة للترشح، في الأول كان بيضغط الوقت عشان الناس اللي ليها نصيب متلحقش، ولكن احنا أكبر نقابة فنية، فقولت حرام أدي مهلة أطول وندي فرصة للمرشحين يلفوا في المحافظات؛ لأن محافظاتنا كتير وفروعنا كتير.
أما عن موقفه من الموسيقار منير الوسيمي، تابع مصطفى كامل: هو نزل من أسبوعين دعم ليا، وكتبت منشور قولت فيه هذا الدعم لا يشرفني ويشرفني دعم زملائي كلهم المحترمين، وانهالت بعدها التعليقات عندي من زملاء بيقولوا إنه متمش محاسبته عن ما تم في الجهاز المركزي للمحاسبات من مخالفات صارخة وطالبوا بالتحقيق معه، ومكنش قدامي فرصة غير إني ألبي طلب الجمعية العمومية.
وأردف مصطفى كامل: فعلًا فتحت لهم التحقيق، وبعد منير الوسيمي طلع يسب ويقذف ومعرفش بيعمل كده ليه وبشوف إن ده نتاج طبيعي لأي شخص بيعمل حاجة غلط وميتمش محاسبته، مش عارف بيفكر إزاي، الشكوى المقدمة ضده مرفقة بمستندات بتقارير جهات سيادية زي الجهاز المركزي للمحاسبات 3 سنوات فيهم بلاوي سودة.
أسباب التحقيق مع منير الوسيمي
تابع مصطفى كامل: منير مثلًا كان مخصص العلاج للزملاء بـ 500 جنيه ومعالج نفسه بـ 32 ألف جنيه، ودافع للموبايلات الخاصة بتاعته أرقام مهولة، واحنا بيحذر علينا في العمل العام تقاضي أي عضو مجلس أي أموال؛ لأنه عمل خدمي تطوعي، وحاليًا احنا مدخلين في أقل من 6 أو 7 شهور حوالي 70 مليون جنيه، هو كان في التقرير بتاعه السنوي بيدخل للنقابة 12 مليون وبياخد منها عمولته 5%، طبعًا كل ده مخالفات صارخة.
وأضاف مصطفى كامل: وفي تقرير الجهاز المركزي للمحاسبات هو ذاكر تكاليف سفرية ما، ومطالبينه الجهاز المرزي بجدوى السفري؛ لأنه غير غير مرفق مستندات لا تذكرة سفر ولا فيزا ولا حساب فنادق، وممكن يكون الفلوس اتاخدت في حسابات، وفيه أمثلة كتير من ده أوي.
واختتم مصطفى كامل حديثه، قائلًا: والله ما أنا اللي طرحت القضية، اللي طرح الموضوع نقباء فروع زي نقيب فرع الغربية الأستاذ أشرف الشهدواي ومجموعة موسيقيين وقالي طول ما احنا سايبين ناس لا تحاسب على ما فعلوه بالنقابة، هتكون النقابة مطمع، وبمجرد ما اتفتح التحقيق دخل هو معايا في مساومات وكلام مرسل وكلام مش منضبط.
