عمرو مصطفى: أغنية افتكرلك إيه هتنزل بصوت أم كلثوم وبموافقة أسرتها.. وأنا هعيد الفن للفنانين تاني
تحدث الفنان عمرو مصطفى، عن استخدامه تقنية الذكاء الاصطناعي لإعادة إحياء أصوات الفنانين، كما كشف عن تصالحه مع أسرة كوكب الشرق أم كلثوم، مؤكدًا أن الوطن العربي شهد انحدارا موسيقيا.
وقال عمرو مصطفى في لقائه مع برنامج ET بالعربي: أنا شايف أن ورثة كل العظماء اللي توفوا جاتلهم الفرصة أن يحيوا ذكراهم بأغنية جديدة، الورثة نفسهم ممكن يختاروها وكمان الجمهور، وأنا بعتبر مي فاروق من أهم الأصوات المصرية.
وأضاف عمرو مصطفى: مش غرور بس أنا اسمي وشغلي والـ 30 سنة اللي اشتغلتهم يسمحولي إني أجرب وأشوف، الصناعة وصلت لدرجة كبيرة من الانحدار في وطننا العربي كله، وعشان نقدر نعمل حاجة نرتقي بيها بالشعوب العربية رجعنا للتراث والمزيكا والموسيقى الشرقية.
وأكد الفنان عمرو مصطفى أنه سيعيد الفن للفنانين مرة أخرى بدلًا من سيطرة المنتجين، قائلًا: دلوقتي اللي مسؤول عن الفن المنتجين، ولكن زمان اللي كان مسؤول عن الفن الفنان زي عبد الحليم حافظ ومحمد عبد الوهاب الله يرحمهم، ودلوقتي لما الفن راح للتجار اتدمر، ولازم الفن يرجع تاني للفنانين وأنا اللي هرجعه.
وأوضح عمرو مصطفى، أنه سيصدر أغنية افتكرلك إيه بصوت كوكب الشرق، قائلًا: أغنية افتكرلك إيه هتنزل كاملة بصوت أم كلثوم بعد ما اتصالحت مع الورثة، وإحنا سايبين الجمهور يحكم، وهاخد كل كلام الجمهور وهروح بيه لأسرة أم كلثوم وأقولهم ده حكم الجمهور لو تمام هتنزل الأغنية.
عمرو مصطفى: أنا ضد الفساد اللي في أغاني المهرجانات
وأشار عمرو مصطفى، إلى أنه ليس ضد أغاني المهرجانات، موضحًا: أنا منتقدتش مطربين المهرجانات هما اللي أخدوا ألحاني، وإحنا ضد الفساد اللي بيقدموه داخل المهرجانات مش ضد المهرجانات.
