سيد رجب يوجه رسالة لـ الوجوه الجديدة: خليك ورا الحاجة اللي بتحبها.. و19 ب ثورة صغيرة في عالم السينما
وجه الفنان سيد رجب بعض النصائح للفنانين المبتدئين والوجوه الجديدة، أهمها عدم التسرع في اختيار الأدوار، والسعي وراء الحلم، مؤكدًا أن دور السينما هو الدعوة إلى التفكير.
وقال خلال لقائه مع القاهرة 24: بقول للمبتدئين خليك دؤوب على اللي أنت بتحبه وافضل حبه لغاية آخر يوم في عمرك، حصل ولا محصلش على الأقل أنت عملت اللي بتحبه، عايز تمثل مثل وأقعد 20 و30 سنة المهم تكون بتعمل اللي أنت بتحبه.
وعن القضية التي يريد مناقشتها في عمل فني، قال سيد رجب: مفيش حاجة معينة، ولكن فيلم 19 ب بيناقش حاجة معينة، وهي الدعوة للمتفرج أنه يفكر في نفسه ويشوف خايف من إيه ويواجهه إزاي، السينما دعوة للتفكير والتغيير، وللنظرة الأوسع على الدنيا، وأنا رأيي أن فيلم 19 ب ثورة صغيرة في عالم السينما.
سيد رجب: بختار أدواري بـ الترموتر
وتحدث سيد رجب عن اختياره للأدوار الفنية، قائلًا: عندي زي ترمومتر بختار بيه الأدوار اللي هشارك فيها، وبسأل نفسي دا هيقدم إيه جديد، عشان يبدو مغاير لما قدمته، مش معقول أقدم شخصية واحدة طوال حياتي، أنا متعتي وسعادتي في تقديم شخصيات متنوعة، ولو قدمت دور واحد طول حياتي بالنسبة لي مش تمثيل.
سيد رجب: وافقت على فيلم 19 ب بسبب رسالته الإنسانية
كما أعرب سيد رجب عن سعادته الكبيرة بالمشاركة في فيلم 19 ب، حيث أكد أنه وافق على المشاركة في هذا الدور؛ لحبه الشديد للحيوانات، هذا بجانب الرسالة الإنسانية الذي يقدمها العمل، قائلًا: أنا علاقتي بالحيوانات كويسة أوي، وبربي الحيوانات والقطط حبايبي، حسيت إن الحيوانات دي بتاعتي، وبلعب معاها حتى لو مش بنصور، وانبهرت بالنتيجة لما شُفت الفيلم في الآخر وحبيته أكتر.
