فرح الزاهد: انتقدت نفسي في فيلم شوجر دادي. وتعلمت الانضباط من ليلى علوي
تحدثت الفنانة فرح الزاهد، عن كواليس مشاركتها في فيلم شوجر دادي، بطولة الفنانة ليلى علوي، والذي يعرض حاليًا في دورعرض السينما.
وقالت فرح الزاهد خلال مقابلة مع برنامج عيش صباحك، الذي يعرض عبر إذاعة نجوم إف إم، إن التعاون مع الفنانة ليلى علوي ممتع، معلقة: أول يوم أشوفها فيه كنت متوترة أوي وكان أول مشهد معاها وعيدنا المشهد كتير أوي لأن كان فيه مشاكل في الزاوية بتاعتي وكنت بقول جمل غلط لكن هي كانت بتفضل تقول لي حلو أوي لحد ما أخدنا على بعض.
وأضافت أنها تعلمت من ليلى علوي الانضباط في المواعيد واحترام العمل، موضحة: عندها انضباط فظيع وحب لشغلها غير طبيعي، وإن لازم أتعود على صعوبات الشغل وهي بالنسبة لي مثل أعلى.
وعن أول تجربة سينمائية لها في شوجر دادي واختلافها عن الدراما التي قدمت فيها تجارب سابقة، ردت فرح الزاهد: السينما محتاجة خبرة كبيرة جدًا وأنا انتقدت نفسي في أول تجربة سينمائية لكن راضية عن نفسي بنسبة 70%.
وواصلت: باخد رأي هنا أختي بعد ما أمضي الدور خلاص وبسألها إيه رأيك أعمل الدور إزاي وكده، وباخد رأيها كمان لما العمل يتعرض وهي بتبقى صريحة معايا في رأيها، لكن مامتي هي اللي باخد رأيها قبل ما أوافق على الدور.
أبطال مسلسل شوجر دادي
ضم فيلم شوجر دادي، كل من الفنانة ليلى علوي، بيومي فؤاد، حمدي الميرغني، تامر هجرس، مصطفى غريب، محمد محمود، مي الغيطي، فرح الزاهد، جوهرة وغيرهم، تأليف لؤي السيد، إخراج محمود كريم.
