مجدي سعيد: أنا في فترة ركود فني.. الناس قالت لي افتكرناك مُتّ | خاص
كشف الفنان القدير مجدي سعيد أسباب ابتعاده عن الفن، لعديد من السنوات، حيث أشار إلى أن هناك فترة لم يشارك فيها بأعمال فنية، وابتعد عن الأضواء، ولذلك هناك البعض ظن بأنه اعتزل الفن، وآخرون ظنوا بأنه قد توفى حسب قوله.
وتحدث مجدي سعيد عن فترة غيابه عن الوسط الفني، قبل مشاركته الأخيرة في مسلسل الاختيار 2، إذ قال في تصريحاته لـ القاهرة 24: في ناس قالت لي افتكرناك مُت لما بعدت عن التمثيل، لكن أنا خدت الموضوع بهزار، ورديت عليهم وقلت لهم مانا واقف قدامكم أهو، أصل هزعل ليه هل إحنا كلنا مُخلدين؟!، ما كلنا هنموت.
أسباب ابتعاد مجدي سعيد عن الفن
وتابع مجدي سعيد: سؤال أنت فين ده بيحيرني مبلقيش إجابة عليه، عشان أنا مش مُقصر، وبعد نجاحي في الاختيار كنت حاسس أن هيكون في فترة ركود بعدها، لكن الحمد لله أنا عندي توازن نفسي وقادر أعيش وأكمل، وطول عمري بدعي ربنا يحطني في المكانة اللي استحقها.
وعن اعتزاله للفن، قال: أنا عمري ما فكرت في الاعتزال، وشايف اللي بيعتزل الفن، دخله غلط من البداية، أو عن عدم اقتناع، في ناس بتدخل الفن عشان تمسك فلوس، أو عشان الشهرة، عشان كدة بيعتزلوا، لكن أنا ضد الفكرة إلا لو في عائق أو ظرف صحي هو اللي بيمنع الفنان من العمل، وبضطر للاعتزال.
