دوللي شاهين: والدي مكنش شايفني حلوة.. وكان كل همي أتحرر من عقليته المتخلفة
تحدثت الفنانة دوللي شاهين عن طفولتها وعلاقتها بوالدها، والتي كانت متوترة باستمرار، مؤكدة أن أهدافها تركزت في التخلص من قيود والدها.
وقالت دوللي شاهين في تصريحات تليفزيونية: طفولتي مكنتش لطيفة جدًا واللي فكراه إني في سن مُعينة كنت عاملة زي الولد وبتعامل زي الولد وشقية جدًا، وعلاقتي بـ أهلي ووالدي بالذات ماكنتش كويسة، ولكن والدتي كانت ملاك.
وتابعت: بابا أثر فيا أكتر من ماما لأن شخصيته قوية جدًا وماما اتجوزت بابا وهي عندها 14 سنة وهو كان عنده 34 سنة، ونقدر نقول إن هو اللي ربى ماما، وغلط جدًا أن حد يتجوز بفرق السن الكبير ده، والمنطقي إن الراجل يكون أكبر من الست بسنتين مثلًا وعادة الست بتنضج أسرع من الراجل، وبتستوعب الحياة أسرع، لأن التربية الشرقية للأسف بتربي البنت أنها تشيل المسؤولية والبيت بدري.
وأضافت دوللي شاهين: ماكنش عندي فتى أحلام، بابا كان راجل شرقي بزيادة وكان عنده قيود كتيرة وكان كل أحلامي إني أتحرر من قيوده، قبل ما أفكر مين فتى أحلامي.
واستكملت: أول جيبة لبستها في حياتي جاتلي هدية وأنا عندي 13 سنة قطعهالي علشان يقهرني ويضايقني، وبقى هدفي إني أتحرر من العقلية المتخلفة دي اللي أنا عايشة فيها، هو كان شايف إني مش حلوة وأنا دايمًا بقول البني آدم اللي عنده مشاكل بتكون من الطفولة وممكن والدي كان كده، أكيد هو مش بيكرهني ولكن كان بيخاف عليا بطريقة تخليه يقفل عليا بزيادة، فأكيد هو شاف أو عاش حاجة خلته كده.
