إياد نصار: مش بحب حد يفرض عليا قواعد في الشغلانة.. وبهزق نفسي كتير
تحدث الفنان إياد نصار عن الكثير من الأمور في حياته، مؤكدًا أنه يحب المغامرة ولا يحب الدوشة والقواعد في العمل.
وقال إياد نصار خلال لقاء تليفزيوني: مش بحب الدوشة والقواعد في الشغلانة، ولو أنا مش عاوز أقدم عمل مش هعمله لو مش حاسه، لإن أنا بحب الشغلانة وبحب أمثل، مش مهم بمثل إيه، مش بمثل على مزاجك أو علشان السوق بيقول لازم تكون في الحتة دي، أنا بمثل لإني بحب أمثل وألعب، ومش بحب حد يفرض عليا قواعد ولو حابب الدور وعاجبني هقدمه غير كده لأ، وأنا بلعب وعندي خيال زيادة فمحدش يمسك ليا خيالي.
وكشف إياد نصار أكثر شيء كان من المستحيل أن يفكر فيه، قائلًا: كنت مستحيل أقول الطلاق هيحصل ومفيش حد لما بيتجوز بيتخيل إنه هيطلق، وهي دي التجربة الوحيدة اللي مكنتش مستعد ليها في حياتي ومكنتش متوقعها ومكنتش متخيلها.
إياد نصار يتحدث عن صفاته
وكشف إياد نصار بعض صفاته قائلًا: مفيش حاجة أنا متضايق من نفسي فيها، ولكن فيه تصرفات بلوم نفسي عليها وبراجع نفسي فيها وبشوف الأبعاد وإيه اللي حصل، وبحاول أكون مصدق اللي بقوله وبكره في نفسي لو قلت حاجة مش مصدقها أو تصرف أنا مش مصدقه وبقول لنفسي أنت بتستعرض فكرة وأنت مش كده وبمسك نفسي أهزقها كتير، ودي مش صفة بكرها فيا، لإني مش بكره إني براجع نفسي كتير ومعنديش مشكلة مع كلمة آسف، ودايمًا بتمنى يكون أكبر نسبة من الغلط عندي علشان أعرف أصلح لو الجزء الأكبر عندي هعرف أسيطر عليه وأصلحه، ومعنديش مشكلة مع كلمة آسف وإني أراجع نفسي وبهزقني كتير.
وأضاف: غامرت في حاجات كتير في حياتي.. وأنا عاطفي في قراراتي وبصدق إحساسي جدا، وبكون شخصية حادة قدام الكاميرا وحاد كمان لو لاقيت الممثل اللي قدامي مش مركز.. وحتى الآن مشتغلتش مع حد مش مركز.
وكشف إياد نصار عن الأشياء التي يريد أن يفعلها الفترة المقبلة: عاوز أرجع أرسم وأعود إيدي على الرسم، وبحاول أكون شخص صحي شوية وبطلت السجاير، وبحاول أصحى بدري وآخد بالي من نفسي ومحتاج أقرأ شوية وأشوف التجارب الروائية الجديدة والرواية واصلة لفين لإن فاتني كتير.
وكشف إياد نصار أنه يشعر أنه أصغر من عمره بـ 10 سنوات، قائلًا: لو هدي نفسي سن معين هيكون 40 سنة لإني بحس إني أصغر من عمري 10 سنين، و40 هو سن النضج وفيه تحول حصل في حياتي لإني هديت.
