ياسمين عز تطالب بالزواج في بيت العائلة.. وسعاد صالح تعارضها: اللي معهوش فلوس يشتري بيت ميتجوزش
طالبت الإعلامية ياسمين عز، بإعادة إحياء فكرة الزواج في بيت العائلة، للتغلب على الأزمة الاقتصادية وللحد من ارتفاع نسب الطلاق، بينما عارضتها الدكتور سعاد صالح ورفضت الزاوج في بيت العائلة لضمان الاستقرار بين الزوجين.
وقالت ياسمين عز في برنامجها كلام الناس: في ظل الأزمة الاقتصادية وارتفاع أسعار الشقق، ظهرت دعوات تطالب بإعادة إحياء الزواج في بيت العائلة مرة تانية، والحقيقة أنا من أنصار هذا الموضوع، وأرى أن أسلم حل لأزمة الشقق والجواز هو الزواج في بيت العائلة لنحد من الطلاق بشكل كبير.
ياسمين عز تكشف مزايا الزواج في بيت العائلة
كما كشفت ياسمين عز مزايا الزواج في بيت العائلة، قائلة: اللي متجوزتش في بيت حماتها الفرح والهنا فاتها واللي متجوزتش في بيت عيلة جوزها هتفضل طول عمرها لاوية بوزها، الجواز في بيت العائلة هيخلي جوزك ميحسش معاكي بالغربة والرهبة، ثانيا لما يكون فيه مشروع جديد بيتفتح في شركة بيقولوا إنهم لازم يتعاقدوا مع بيت من بيوت الخبرة ما بالك لما تعيشي في بيت الخبرة نفسها وفيه الأب والأم.
وأردفت ياسمين عز: جوزك مش هيجي يقول لك البسي عشان رايحين لماما لإنك عند ماما، وهتخرجي من بيت عيلة باباكي ومامتك واخواتك الحلوين القرود على بيت عيلة تاني، فيه مامته وباباه واخواته البنات الغزلان إيه المشكلة بالعكس مفيش أي فرق.
وأردفت: لما تتجوزي في بيت عيلة جوزك هيتكسف يزعق لك قدامهم ويعلي صوته ويقول إنكم متخانقين ولو حصل وزعقتم حماكي هياخده من إيده ويجيبه يبوس راسك والضرب على الحديد وهو سخن أحسن، لكن لو أنتم في البيت لوحدكم الخناقة بتاخد لها أسبوعين وعمرك بيضيع في القمص.
واستكملت: لما تتجوزي في بيت عائلة جوزك في يوم تطبخي ويوم لأ، وآخر حاجة هتفكري فيها الطبيخ لإن حماتك هتقوم بالواجب وهتساعدك وغسيل المواعين هيكون بالدور يوم اه وتلاتة لأ وباقي الأيام متوزعة على الباقين، وكمان جوازك في بيت عيلة جوزك هيخليكي تاخدي حسنات في الرايحة والجاية على كوباية الشاي اللي بتعمليها لحماكي.
سعاد صالح تخالف ياسمين عز وترفض الزواج في بيت العائلة
ومن ناحيتها، عارضت الدكتورة إسعاد صالح ضيفة حلقة اليوم من برنامج كلام الناس ياسمين عز، وقالت: اللي مش معاه فلوس يشتري بيت ويجبر مراته تعيش مع أهله يبقى أحسن له ميتجوزش، يا معشر الشباب! من استطاعَ منكم الباءة فليتزوج، لإن الزواج في بيت العائلة هيكون فيه كبت على الزوجة والأصل يكون لها سكن مخصص، والزوجة من حقها تشترط السكن المستقل، وده من الأفضل علشان الحفاظ على الاستقرار والأمن والأمان ومن الأفضل يكون فيه انفصال واستقلالية.
وأضافت: من الوارد يكون فيه غمز أو لمز بين الزوجة وحماتها، أو الزوجة لا تعجب أم الزوج، وأنا حماة وبتكلم بصفتي حماة للأبناء والبنات والمفروض أعيش مستقلة كي أسبب لابني الراحة والسعادة وحق السكنة من الحقوق التي أوجبها الله على آدم منذ أن خلق آدم فقال الله سبحان وتعالى فَلَا يُخْرِجَنَّكُمَا مِنَ الْجَنَّةِ فَتَشْقَىٰ ما قالش فقتشقيان، فالزوج مكلف بالسكنة والنفقة.
