عزيز الشافعي: أتمنى تقديم عمل يغير قوانين تخص المرأة.. وشخصيتي حادة
تحدث الشاعر والملحن عزيز الشافعي عن العمل الذي يتمنى أن يقدمه ويغير من خلاله بعض القوانين الموجودة حاليا، إلى جانب حديثه عن أصدقائه وعلاقته بيهم.
وقال عزيز الشافعي خلال تصريحات تلفزيونية: المرأة في المجتمع الشرقي مظلومة، وأوقات كتير بحس إن الست مظلومة، وأتمنى إني أقدم عملا فنيا أو أغنية أقدر من خلالها أغير القانون الموجود بشان المرأة.
وعن الحب في حياته وخوفه من المجهول، أضاف عزيز الشافعي: الحب بالنسبالي وبالنسبة للناس كلها هو الحياة، والحب بالنسبة للفنان هو وقود الشغل.. والأهم بالنسبالي إني أحب، لكن لو اتحبيت بس هكون بائس.. والمتعة الحقيقية إني أحب مش بس أتحب.
واستكمل عزيز حديثه: مش بخاف من المجهول، ولكن بكون عايز أعرفه.. وعايز أعرف بعد 20 سنة الناس هتقول عليا أيه؟! والزمن خلاني أعقل وأهدى، ولكن كبرني ودي مش حاجة حلوة، وأكتر حاجة بحبها في نفسي المثابرة والإرادة.. وبنسبة كبيرة راضٍ على نفسي وأنا ناقد شخصي لنفسي، ولكن مش بعتذر ليها، ودايما حاسس نفسي أني عندي 20 سنة.. والجمهور المستهدف بالنسبالي هو من 3 إعدادي للجامعة وبحاول أشوف بيحبوا أيه ويسمعوا أيه.
واختتم عزيز الشافعي حديثه عن علاقته بأصدقائه: دايرة صحابي صغيرة جدًا، وأنا شخصيتي مش معمرة أوي وشخصية حادة.. ولما بزعل قلبي أسود جدًا ممكن أفضل زعلان سنين، وعشان كده مش بيعيش ليا صحاب.
