بسبب عدم استخراج تأشيرة السفر إلى باريس..
محمد رحيم: مش عارف استلم جائزتي في فرنسا ومصر بتتحرم من نجاح عالمي وبتحسر على تاريخي
أعرب الملحن محمد رحيم عن حزنه الشديد واستيائه من عدم قدرته على استخراج تأشيرة السفر إلى فرنسا، لاستلام تكريمه من جمعية Sacem.fr العالمية وهو درع الإبداع الماسي، مشيرًا إلى أن وزيرة الثقافة دكتور نيفين الكيلاني ووكيلتها حاولتا مساعدته، ولكن باءت المحاولات بالفشل، ولم يستطع السفر لفرنسا، ومن المقرر إقامة حفل التكريم مساء اليوم.
وكتب محمد رحيم عبر حسابه على فيسبوك، الآتي: نجاح عالمي يضيع على مصر بسبب تأشيرة السفر.. إحساس بالظلم والقهر ملوش وصف ولا تشبيه لما تقعد تشتغل 25 سنة تبذل فيهم أكبر مجهود علشان تثبت نفسك وتحاول يكون ليك مكان وبعد ما ربنا سبحانه وتعالى يكرمك وتنجح وتشتغل مع أكبر نجوم عمرو دياب ومحمد فؤاد وحميد الشاعري في نفس الشهر وأنت عندك 19 سنة، تدخل في محنة وتحدي أكبر منه بكتير اسمه الحفاظ على النجاح ومن ساعتها تبدأ رحلة أكثر جدية ومجهود بتشتغل في اليوم 20 ساعة ومع كثرة الطلب على أعمالك وعلى قد طموحك لما بتشوف أعمالك بتنجح وبتسمعها في الشوراع والعربيات بتدب فيك طاقة جديدة كل يوم وتبدأ تفكر وتدور وتشتغل وتروح مشاوير وتقابل ناس وترجع الصبح علشان كان عندك غنوة في الاستوديو فرحان بيها وخايف عليها مرة مع مطرب نجم كبير نفسك تضيفله علامة مضيئة في مسيرته ومره تانية مع مطرب لسه بيبدأ وخايف من رهبة الاستوديو ولازم تعامله نفسيا زي أخوك الصغير أو ابنك لأنه موهوب بس لسه معندوش خبرة.
وأضاف محمد رحيم: بعد كده تدخل في دوامة التوزيع الموسيقي ومشاكلها ووجهات النظر المتعددة اللى فيها اللى حرفيا ممكن توقع العمل بتاعك على الأرض وممكن ترفعه سابع سما ولازم وأنت بتنناقش في أي موضوع فني تاخد بالك إن الموزع ده اسمه فلان الفلاني اللي ممكن يكون بيشتغل الشغلانة دي وأنت لسه عيل بشورت فتخللي بالك من كلامك ودور بقى على الآلية اللي تتكلم بيها معاه علشان لو عندك وجهة نظر في شغلك توصلهاله بطريقة يقبلها ويتفهمها ده غير الشعراء اللي كل واحد فيهم دماغ ومدرةه وطريقة تفكير وبتحلم في كل عمل إنكوا تقدموا أحلى عمل مع بعض واتعب بقى في إنك تاخد أحسن نتيجه في حدود اللى يقدر يديهولك لأن فيه اللي شاطر في كتابة مواضيع بس مش بيعرف يكتب على ألحان وفيه اللي بيكتب على ألحان بس النص سياقه بيطلع ضعيف وفيه اللي شاطر في الاتنين بس مفيش بينكم كيميا وفي اللي بينكم كيميا بس معندوش مسؤولية وفيه اللي زعلان منك علشان اشتغلت مع شاعر تاني أكتر منه آخر شهرين وفيه الجدع الصاحب والمحترم بس محتاج يتمرن كتير وفي كل الحالات لازم تنتج ولازم تشتغل ولازم تحافظ على مستواك وتقدم أفضل ما يمكن لحد ما الغنوة تروح لصاحب نصيبها وتدخل في مرحلة الشركات والتنازلات ويا ترى هتتنازل عن حقوق عيالك ازاي وكام سنة ومقابل قد إيه وبعد كل ده ييجي المطرب يقرر مينزلش غنوتك ويحطها في الدرج أو يسقعها حرفيا لمدد والله بتوصل لـ 10 سنين بتعيش ضغط نفسي وعصبي وتحميل زائد عن الحد.
وأردف محمد رحيم: لكن أجمل حاجة بتحصل بجد في كل ده هي لما غنوتك بتنزل تنجح وتلاقي إحساسك وصل للناس ولجنسيات تانيه وشعوب مختلفه عرب وأجانب ومع السنين تلاقي جواك طاقة أكبر وحب وشغف يزيد كل يوم فتدخل في مساحات أكبر وتخوض تحديات جديدة وتبدأ نفس الرحلة من الأول ومطلوب منك طول الوقت تبقى دايما بتطور من نفسك وبتذاكر وتشتري أجهزة وتتعلم برامج وبتعرف كل يوم معلومة جديده تيجي على صحتك مش مهم تيجي على راحتك مش مهم وبمرور السنين تلاقي نفسك بعد مجهود شاق ومضني ربنا وفقك ومشيت مشوار كبير وحققت مسيرة طويلة وبقيت من الناس اللي المفروض عندهم تاريخ واسم مهم في مصر والوطن العربي وأعمالك بقت بتحتل منطقة خاصة جدا في قلوب الناس وتلاقي الجمهور بيحس بيك وبأعمالك وبيقدر يميز شغلك ويضعه في مكانة متميزة وطبعا هو ده حرفيا أكبر ثواب وهدية بتحصل للفنان؛ لأنه في ماعدا ذلك احنا معندناش ثقافة تقدير واحترام المبدع ولا الفنان وللأسف بتلاقي كل الناس اللي أنت حرفيا قدمتهم في بداياتهم أو على الأقل عملتلهم الأغنيه اللى حولت مسار حياتهم الفنية والتاريخية الإعلام مسلط عليهم الضوء ومتواجدين في كل المناسبات وأنت للأسف مبتلاقيش حد يفكر يقرب من تجربتك ولما يشوف عمل ناجح يسلط الضوء على صناع العمل اللي دايما هما قاسم مشترك في أغلب نجاحات الربع قرن الأخير واللي أنا بتشرف إني أكون واحد منهم لكن علشان ربنا سبحانه وتعالى عادل وهو أدرى بتعبك ومجهودك فتحس إنه هو اللي عمره ما بينساك وبيخليك تشوف شواهد بعينك بجد بتفرحك وبتحسسك بقيمتك الحقيقية وتقدير ما بعده تقدير وكفاية إنك تلاقي أعمالك ناجحة في كل دول العالم وتلاقي الأجانب مش بس بيترجموا أعمالك بلغتهم لأ ده كمان بيغنوها بالعربي وساعتها بتحس بالفخر إنك نجحت توصل لغة بلدك للعالم وتشوف أكبر مؤسسات وشركات عالميه بتتكلم عنك زي apple USA وRoland وsacem باريس اللي تكتب اسمك في الكتالوج واللي تخصصلك صفحة بأعمالك وتقول عليك كيميائي الموسيقى العربيه apple.
وأضاف محمد رحيم: وتلاقي أكبر جمعية مؤلفين وملحنين في العالم sacem باريس تبعتلك أنت الوحيد دعوه للتكريم أنت وأسماء معدودة من كوكب الأرض علشان تيجي تاخد شهادة الاحتراف الدولية الذهبية ومفيش مذيع يستضيفك يقولك احكيلنا ازاي حققت العالمية ورفعت اسم بلدك وأنت قاعد في مصر ووصلت فنك لكل دول العالم وازاي أعمالك اترجمت لأكثر من 30 لغة ويقرب من تجربتك اللي تخطت ال 2000 عمل بأصوات معظم نجوم مصر والوطن العربي واللي تخللها كمان صناعة نجوم أكثر من 25 اسم وتبقى أنت أكتر ملحن اهتميت بملف صناعة النجوم الجداد وكلهم الحمد لله بقوا النهارده أكبر أسماء في الوطن العربي، بالإضافة للنجوم الكبار أصلا غير أعمالك في الدراما والسينما والمسرح والأغاني الوطنية والدينية والاجتماعية والعاطفية مع تجاهل تام ومتعمد من الإعلام وحرمان من المشاركة في الأحداث الهامة والعامة والمناسبات القوميه حتى ولو بدون أجر هيبقى على قلبي زي العسل الصدمة الكبيرة بقى اللي أنا بعيشها النهارده إن كلمتني جمعيه الـ Sacem.fr العالمية علشان اروح استلم درع الإبداع الماسي Full permanent membership.
واستكمل محمد رحيم حديثه، قائلًا: وده بيعتبر أعلى وأرقي وسام ممكن يحصل عليه مبدع في العالم وكنت أتمنى أروح ارفع علم مصر من فرنسا وأقول إن ده إهداء لكل المبدعين المصريين ولبلدي أم الدنيا لكن للأسف مفيش تأشيرات بتصدرها سفارة فرنسا قبل شهر أغسطس والحفلة بكره إن شاء الله في باريس 13/6 وللأسف مش هقدر أروح علشان مفيش visa انتوامتخيلين الكارثة والعبث مع إني كل مرة عملتها قبل كده كانت بتخلص في أسبوعين دلوقتي بقالي شهرين مش عارف اطلعها انتوا متخيلين سذاجة السبب مصر كلها بتتحرم حرفيا من نجاح عالمي يساوي جائزة الأوسكار علشان أنا مش عارف اطلع فيزا لحضور مراسم الاحتفال كلمت كل الناس حاولت افهمهم أهمية الحدث ولكن مع الأسف لم يهتم أي أحد إلا السيدة المحترمة وزيره الثقافة د نيفين الكيلاني المحترمة الراقية ووكيلة وزارة الثقافه د إيمان نجم المحترمة الخلوقة وتم مخاطبة القنصلية الفرنسيه وبالفعل تم تحديد موعد لإجراء المقابلة ومع كل أسف لم تصدر التأشيرة حتى الآن والنتيجة إن كل المبدعين المكرمين من الدول الأجنبية هيروحوا يستلموا الدروع بتاعتهم إلا أنا علشان مفيش تأشيرات سفر بجد حسبي الله ونعم الوكيل أنا كان نفسي أوري كل الدنيا إن مصر فيها مبدعين أعمالهم بتلف العالم.
واختتم محمد رحيم حديثه، قائلًا: وكان نفسي الناس تشوف الروس واليونانيين والإنجليز والفرنساويين والصينين والايطاليين من كل دول العالم وهما بيغنوا باللهجه المصريه علشان نثبت للعالم إن الفنان المصري مبدع وناجح مش حرامي تصميمات ورسومات أو حرامي ألحان لكن مع الأسف حتى الفرصة اللى بتيجي لوطن كامل محتاج دعم معنوي لشباب بلده الطموح بتضييع قدام عنيه وأهم حاجة في الجائزه دي كانت رسالة مفادها إنك كشاب مصري مش لازم تهرب بره البلد أنت ممكن تبقى عايش في بلدك ومجهودك يوصل للعالم كله وبدل ما تهاجر أوروبا لأ أوروبا هي اللي هتجيلك لحد عندك لو تعبت والتزمت في شغلك وأنت عايش في بلدك عادي واديني واقف بتفرج وبتحصر على الربع قرن اللي بذلت فيه من دمي وأعصابي وروحي وعمري والله على كل شيء شهيد وسأقوم بإرفاق الايميل المرسل باللغه الإنجليزية والفرنسية من الـ sacem france علشان كل الناس تشوف تترجم الكلام اللي في الدعوة، وشكرا، الخلاصة إني مش هعرف أروح استلم الجائزه بسبب تأخير التأشيرة وللأسف مفيش أي دعم.
