جوزي عرف واحدة عليا وحلفت على المصحف لو كلمها تاني أبقى طالق منه فهل أنا مذنبة؟.. أمين الفتوى: مش هقدر أجاوبك
أجاب الشيخ عمرو الورداني أمين الفتوى بدار الإفتاء المصرية على سؤال ورد إليه من إحدى المتابعات نصه: جوزي عرف واحدة عليا.. وحلفت على المصحف إنه لو كلمها تاني أبقى طالق منه، وعرفت إنه كلمها تاني، ومش عارفة أعمل إيه؟ وهل أنا عليا ذنب؟
أمين الفتوى: يجب أن أتواصل مع الزوج أولًا للتحقق منه
وقال الورداني، خلال تصريحات تليفزيونية، إنه لا يستطيع الإجابة عليها في وقوع الطلاق من عدمه في هذه الحالة، مؤكدًا أنه يجب أن يتواصل مع الزوج أولًا ليتحقق منه، لكي يحكم بوقوع الطلاق من عدمه، موضحًا: مسألة الطلاق وقع ولا موقعش مش هقدر أجاوبك فيها، هو اللي لازم يكلمنا عشان نتحقق منه، ونقدر نجاوب عليه.
وطالب أمين الفتوى المتصلة بضرورة الجلوس مع زوجها، ومعرفة سبب المشكلة من الأساس، قائلًا: هو بيعمل عمل فاسد ويحاسب عليه أمام الله، بس لازم نقعد ما بعض ونعرف هو عمل كده ليه؟ ونحل سبب المشكلة.
وأضاف: أنتي بتعملي حاجتين غلط، أولًا بتفتشي في التليفون، وثانيًا بتسيبي أصل المشكلة وتمسكي في الفرع إنه بيكلم واحدة ست.
وتابع: أصل المشكلة إنه علاقتهم محتاجة تعود إلى الاتزان والتوافق، أول حاجة تقعدي مع جوزك وتعرفي هو بيعمل كده ليه، وتقولي له كلميني كصديقة أنا عايزة أعرف إيه الحكاية؟ أنا عارف إن الأمر ممكن يكون صعب عليكي، ونصحيتي لحضرتك لازم تتكلمي معاه بوضوح وبصراحة، ولو معرفتوش تتفاهموا، تعالوا على مركز الإرشاد الزواجي.
