عمرو سلامة: خايف أحس بتأنيب ضمير تجاه الأطفال اللي بقدمها للوسط.. ومتوقعتش استمرارية داش وعمر شريف
تحدث المخرج عمرو سلامة، عن فكرة تعامله مع الأطفال دائما في أعماله واكتشافه لهم، مؤكدا أنه لم يكن يتوقع الاستمرارية لهم في مجال التمثيل.
وقال عمرو سلامة في تصريحات تلفزيونية، إنه يشعر بالذنب تجاههم، بعدما قدمهم لهذا المجال.
وتابع: بختار الأطفال الممثلين بإني أشوف أطفال كتير عشان أعرف أختار الأحسن، ويكون قدامي اختيارات متننوعة، وفي فيلم لامؤاخذة التصفيات وصلتني لـ أحمد داش ومعاه طفل تاني، وحطيتهم في اختبارات كتير لحد ما استقريت على داش، وعادة بتعامل مع الأطفال في التصوير على إنهم شخصيات ناضجة ومش بطبطب عليهم، وشايف إن الوسيلة دي بتنفع جدا في الشغل.
وأكد أنه لم يكن يتوقع الاستمرارية لـ أحمد داش وعمر شريف، ولكنهما قررا أن يكملا المسيرة: مكنتش متوقع إن أحمد داش هيكمل مسيرة التمثيل، لأننا شوفنا أطفال كتير بتبدأ وهي صغيرة وبتكون كويسة جدا بس مش بتكمل لما بتكبر شوية، فالموضوع بيعتمد على المجهود الشخصي لكل ممثل فيهم، واللي حصل إن عمر شريف وأحمد داش كان عندهم الرغبة إنهم يكملوا مسيرة التمثيل، وموقفوش عند نجاح لامؤاخذة وبرة المنهج.
وتابع سلامة معربا عن شعوره بالذنب تجاه الأطفال الذين قدمهم لعالم التمثيل: دايما ببقى قلقان تجاه الأطفال اللي بقدمها للتمثيل، وببقى حاسس إني عملت فيهم مصيبة، لأني إديتهم فرصة يظهروا كممثلين وفي أدوار بطولة، ببقى خايف إن حياة الطفل ده بعد 10 سنين تتدمر بسببي وأحس ساعتها بتأنيب ضمير.
واختتم حديثه قائلا: عشان كدة بحب أتناقش مع أهل كل طفل، وأقولهم يتأكدوا من قرار موافقتهم، وبطلب منهم يركزوا هيتعاملوا مع الطفل المميز ده إزاي، اللي مش هيعيش حياة طبيعية، وهيتسمى في فصله الفنان، وكل الناس فجأة هتبقى عايزة تتصور معاه.
تقديم عمرو سلامة لـ أحمد داش وعمر شريف
وقدم عمرو سلامة الفنان أحمد داش من خلال فيلم لامؤاخذة، الذي عرض في عام 2014، وحقق العمل نجاحا جماهيريا كبير، ومازال يُشاهد حتى اليوم، وكان سببا في سلسلة من النجاحات لـ داش.
كما قدم عمر شريف في دور مميز في فيلم برة المنهج، الذي عُرض في عام 2021، وأعجب الجمهور بطلته، وشارك بعدها في عدة أعمال، آخرها مشاركته في مسلسل تحت الوصاية بطولة الفانة منى زكي.
