السيسي: بيقولوا بتهدوا الجوامع حرام عليكم يا مسلمين.. هنرجع الجوامع والكنائس تاني بس هترجع صح
قال الرئيس عبد الفتاح السيسي، رئيس الجمهورية، إن بناء الدول وإصلاحها ليس بالأمر السهل واليسير.
وأضاف الرئيس عبد الفتاح السيسي، في كلمته منذ قليل، خلال انطلاق فعاليات المؤتمر الوطني للشباب بمقر جامعة برج العرب التكنولوجية: "الأكل غالي صحيح، بس بنبي الدولة ومعالجة تاريخ طويل، عايز أقولكم على حاجة، مارضيتش أقول لدكتور مصطفى وقف محور المحمودية، ووري الناس كان شكله عامل إزاي، وهقول جملة صعبة، كانت الناس راضية وساكته، نخليه كده وناكل، ولا أشيله وأخليه زي ما بتشوفوه دلوقتي والدنيا تبقى صعبة شوية، أسيب الناس مرمية في الشوارع ونايمة في الصفيح والأكل موجود ناكل، ولا أسكنهم في بشاير الخير والدنيا تبقى غالية شوية، عملنا الـ 20 كيلو الأولانين من محور المحمودية".
وتابع الرئيس السيسي: “كانت كل الناس بتشتكي على الجرائد وعلى مواقع التواصل، ويقولك بتهدوا الجوامع حرام عليكم يا مسلمين، يا سيدي هنرجع الجوامع والكنائس تاني بس هترجع صح، بتهد اللي موجود وبتعمله تاني عشان توصل للي احنا عملناه في المحور، وأنا بكلمكم كده بقالنا سنتين ونصف شغالين في امتداد محور المحمودية 55 كيلو، لنصل حتى البحيرة، بيقولك البلد بتحب الطرق.. لا مش واخدين بالكم يعني إيه بلد ولا إيه؟!، الدولة حاجة تانية خالص، التخطيط بيقوم بيها علماء ودكاترة جامعة ودكاترة بالوزارات المتخصصة، إذا استطاعت الدولة القيام بها يبقى خير”.
جامعة برج العرب التكنولوجية
وقبل قليل، تفقد الرئيس عبد الفتاح السيسي، جامعة برج العرب التكنولوجية، بحضور الدكتور أيمن عاشور وزير التعليم العالي والبحث العلمي، والدكتور محمد مرسي الجوهري رئيس الجامعة.
وقدم الدكتور محمد مرسي الجوهري رئيس جامعة برج العرب التكنولوجية، عرضًا لـ الرئيس السيسي عن جامعة برج العرب، موضحًا أن الجامعة تضم كلية تكنولوجيا الصناعة والطاقة، والتي تضم أقسام تكنولوجيا المعلومات وتكنولوجيا السكك الحديدية وتكنولوجيا الجرارات والمُعدات الزراعية وتكنولوجيا الغزل والنسيج وتكنولوجيا الصناعات الغذائية، بالإضافة إلى كلية تكنولوجيا العلوم الصحية والتي تشمل أقسام تكنولوجيا الصناعات الدوائية وتكنولوجيا إدارة المعلومات الصحية وتكنولوجيا مساعد تمريض وتكنولوجيا تركيبات الأسنان.
