منى هلا: أختي لبست النقاب واستغربت لأنها كانت ممثلة.. وسعاد حسني مكنش عندها حكم أخلاقي على أدوارها
تحدثت الفنانة منى هلا عن شقيقتها الفنانة المعتزلة نادية هلا، موضحة أنها فوجئت بقرار شقيقتها بالاعتزال وارتداء النقاب، خاصة وأنها كانت في بداية مشوارها الفني.
وقالت منى هلا في لقائها مع الإعلامية سهير جودة في بث مباشر على فيس بوك: أختي لبست النقاب وهي حرة في قرارها، ولكني استغربت لأنها قبلها بدأت تمثل ولكن أنا معنديش مشكلة دي حريتها الشخصية، وهي مش بتضايق من جرأتي ومينفعش أي حاجة تكسر علاقة الإخوة بينا.
منى هلا: سعاد حسني أعظم ممثلة على وجه الأرض
كما تحدثت منى هلا عن ضرورة عدم الحكم الأخلاقي للممثل على الأدوار التي يقدمها، قائلة: القراءة والثقافة والتعلم بيخليكي فاهمة النفس البشرية كويس جدًا وبتدي لكل واحد مبرراته لأن مبيكونش عندنا حكم أخلاقي على اللي حوالينا.
وتابعت منى هلا: في التمثيل مبيكونش عندنا حكم أخلاقي على الشخصية اللي بنقدمها، والوحيدة الله يرحمها سعاد حسني هي أعظم ممثلة خلقت على وجه الأرض مكنش عندها حكم أخلاقي على أي شخصية بتلعبها، ولذلك مفيش منها في العالم كله.
وأضافت: فكرة التعلم والمعرفة بيخلينا طول الوقت عندنا مبررات للبني آدمين، لأننا بنشوفهم من وجهة نظر إنسانية مش قانونية ولا أخلاقية.
منى هلا: البشر دمروا الكوكب
وعلقت الفنانة منى هلا على تصريحها السابق، بأن البشر يستحقون فيروس كورونا، موضحة: مش فاكرة إني قولت كده ولكن إحنا كبشر دمرنا الكوكب وسبب خراب حاجات كتير جدًا، في حيوانات انقرضت بسبب البشر، والتلوث والعوادم، كده كده الطبيعة هتقلب علينا قريب أو بعيد ونشوف اللي بيحصل من كوارث طبيعية دلوقتي زي الحرائق بدون سبب والفيروسات بدون أسباب.
