ألفت عمر: موت أصحابنا الفنانين الشباب أثر عليّ.. ولو حد مكاني كان اتحسر على نفسه
كشفت الفنانة ألفت عمر، أنها كانت تفكر في ترك مجال الفن، بسبب عدم مشاركتها في أعمال فنية لتغطي احتياجاتها، ولكنها لم تفعل ذلك، وظلت صامدة في ظل الظروف التي مرت بها، مؤكدة أن فقدان العديد من أصدقائها الشباب أيضًا داخل الوسط الفن، أثر عليها تأثيرًا سلبيًا بشكل كبير.
ألف عمر: لو أي حد مكاني كان أتحسر على نفسه
قالت ألفت عمر في تصريحات لـ القاهرة 24: أكيد لو أي حد في مكاني كان يمكن اتحسر على نفسه، أو يأس وساب الشغلانة من زمان، بسبب الشغل وموت أصحابنا الفنانين في عز شبابهم، من التعب في الشغل كل ده أثر عليا جدًا.
وأضافت ألفت عمر: في بعض الفنانين بيقولوا اعتزلوا وهما لسه مخلصين بطولات من 3 شهور، فما بالك باللي ظروفه زيي أو أوحش مني، المهم أنا مستسلمتش بس أكيد زعلت جدًا من ظروف الشغل.
أضافت ألفت عمر: السنة كلها بتعدي وأنت بتشتغل عمل واحد وجايز يكون متشاف أو لا بس الواحد بيعمل اللي عليه، وكنت فاكره إني أزعل شوية وأقول خلاص وأهدي نفسي ونفكر بشكلٍ إيجابي أن الزعل خد وقته وخلص، ولكن للأسف اكتشفت إنه أتحول لمرض نتيجة الضغط العصبي من قلة الشغل أو من كثرة ساعات العمل والإرهاق وقلة النوم.
مرض ألفت عمر
كانت أُلفت عمر، أعلنت تعرضها لوعكة صحية خلال الفترة الماضية، وكتبت منشورًا عبر حسابها الشخصي بموقع فيسبوك، جاء فيه: صباح الفل لما كتير سألوني إيه اللي حصلي قلت أقولكم.. طلع عندي كسل في الغدة الدرقية نتيجة حرق الأعصاب والدم في الشغلانة دي.
وأضافت أٌلفت عمر: الغدة بتعصبك وبتحجز الميه تحت الجلد وبتعطل الحرق في الجسم مهما عملت دايت مش هتخس وترجع زي ما كنت.
