نجل شقيق عبد الحليم حافظ: بنفكر في إنشاء متحف للعندليب.. وورثه راح للي مسيطرين على الصوتيات
تحدث محمد شبانة نجل شقيق عبد الحليم حافظ، عن مقتنيات العندليب الراحل، موضحًا أن العائلة بصدد إنشاء متحف خاص للعندليب، بجانب حديثه عن الخطوط الحمراء في حياة العندليب الراحل.
وقال محمد شبانة في لقائه مع القاهرة 24: بنفكر نعمل متحف لعبد الحليم، ولكن مينفعش في شقة الزمالك لأنها جوا عمارة، واحنا عايزين حاجة تبقى مفتوحة 12 ساعة، وبنشوف بعض الجهات علشان المتحف.
وأوضح محمد شبانة: إرث عبد الحليم نفسه، راح للمستفيدين اللي بعد وفاة عبد الحليم سيطروا على الصوتيات، مكنش عنده أملاك وكنا عايشين في حاجات إيجار وحاجات بسيطة.
أما عن الخطوط الحمراء في حياة العندليب الراحل، فعلق محمد شبانة قائلًا: حد الله ورسوله الخطوط الحمراء في حياة عبد الحليم حافظ، كان بيتقي الله ورسوله، كان سمعة ونضافة واسمه يعيش لحد دلوقتي.
وأضاف: كان عنده طيبة وتلقائية وطيبة، حتى اللي معاه في الوسط الفني بيحبوه، مكنش بيعدي حدود ربنا، كان بيتصدق ويصوم، وفي فيلم لحن الوفاء كان قابض 100جنيه، طلع اللي في جيبه وأداه لأحد الأشخاص عشان بيجوز بنته، قاله أنت بلدياتي.
حقيقة زواج عبد الحليم حافظ وسعاد حسني
كما كشف محمد شبانة، حقيقة زواج سعاد حسني والعندليب، إذ أكد أن هذا الأمر عار تمام من الصحة، وأنها مجرد شائعات، قائلًا: جينجاه أخت سعاد حسني كانت بتركب الموجة، ومفيد فوزي قال إنهم اتجوزوا 6 سنين وعندي الشريط، ولما قُلت له فين الشريط ده، قالي أصله في المكتبة واتحرق.. طب ازاي.. عبد الحليم هيتجوز واحدة عندها 17 سنة إزاي دي قاصر.. حتى الورقة اللي طلعوها كلها كانت مغالطات، منها إمضاء يوسف وهبي، وحاجات كتير كانت كلها غلط.
