محمد محمود عبد العزيز: تكريم والدي من الرئيس السيسي تكريم للفن كله.. ومشرفني في حضوره وغيابه
أعرب الفنان محمد محمود عبد العزيز، عن سعادته الشديدة بتكريم اسم والده الفنان الراحل محمود عبد العزيز، من قِبل الرئيس عبد الفتاح السيسي، وذلك في المؤتمر الوطني للشباب بالإسكندرية.
وقال محمد محمود عبد العزيز في مقطع فيديو نشره عبر حسابه الشخصي بموقع انستجرام: الموضوع بالنسبة ليا كبير جدًا وأنا في العادة مش بعرف أتكلم لما بتيجي سيرة والدي، واللهم لك الحمد والشكر بس أبويا بجد سبحان الله مشرفني في حضوره وغيابه وبيخلينا نتباهى واسمه موجود ومنور اللهم لا حسد، أنا يمكن تقريبًا مفيش يوم يعدي عليا إلا وحد يبعتلي صورة أو مشهد لأبويا أو فيديو له.
وتابع محمد محمود عبد العزيز: لكن المرة دي الموضوع مختلف شوية، لأن المرة دي اسم أبويا بيتكرم من رئيس جمهورية مصر العربية يعني بيتكرم من مصر، ومصر دي كانت بالنسبة لوالدي ربنا يعلم إزاي وبيتكلم عليها إزاي في أي مكان في العالم.
وروى الفنان محمد محمود عبد العزيز موقفًا لوالده الراحل، أظهر خلاله مدى حب الراحل لوطنه مصر، قائلًا: في موقف أول مرة أحكيه أيام الانفلات الأمني، كان والدي بيتابع النشرة والأخبار وفاجأة لقيناه بيبكي بطريقة شديدة ومنفعل جدًا، ويقول مصر كدة بتضيع حرام عليكوا اللي بيحصل فيها ويحسبن، وكان البكاء بحرقة، وفجأة في وسط كل ده ويروح قايم ماسح دموعه، ويقول لا مستحيل مصر تضيع ومصر فيها رجالة وهترجع تاني، وكان عنده إيمان قاطع إن مصر تفوق وترجع بسرعة، وده حصل الحمد لله.
محمد محمود عبد العزيز: تكريم والدي من الرئيس بعد 7 سنين من غيابه تكريم للفن كله
وأضاف محمد محمود عبد العزيز، أن تكريم اسم والده الراحل من رئيس الجمهورية، بمثابة تكريم للوسط الفني، موضحًا: أنا شايف إن تكريم والدي ليس له لوحده ولكنه تكريم ليا ولأخويا ولأولادنا، وأنا شايف إن تكريم والدي بعد 7 سنين من غيابه من وجهة نظري إنه تكريم للفن كله ولكل الفنانين المصريين، وبيأكد أهمية الفن وتأثيرهم وتاثير أعمالهم حتى بعد رحيلهم، خاصة أن التكريم تحت مسمى نماذج مصرية ملهمة ومؤثرة.
