تيام مصطفى قمر عن فيلم أولاد حريم كريم: نقطة مهمة بمسيرتي.. وماشيين برؤية المخرج
أعرب الفنان الشاب تيام مصطفى قمر عن سعادته بالتعاون مع والده، في فيلم أولاد حريم كريم، الجزء الثاني من فيلم حريم كريم، الذي يعكف على تصويره خلال الفترة الحالية.
وقال تيام مصطفى قمر خلال حواره مع القاهرة 24: الفيلم بيلخص طفولتي واتربيت عليه وحافظه من أوله لآخره وتقريبًا كل حد في جيلي بيحب الفيلم ده وشافه، ومكنش في بالي إن فيه جزء تاني، ولما عرفت تحمست جدًا ولما اتعرض عليا مترددتش لحظة، ده غير إن انا وبابا كان نفسنا نشتغل مع بعض وملكن مستنيين المشروع الصح إننا نعملها.
وتابع تيام: ولما لقينا الفرصة والفيلم قولنا إنه هيبقى حاجة حلوة أوي، وفخور إني معاه في الفيلم وحاسس إن دي هتبقى نقطة مهمة أوي في مسيرتي، وهو أكتر بني آدم الناس بترتاح وهي بتشتغل معاه ولما بروح اللوكيشن بلاقي الناس معاه مرتاحة وفرحانين وفيه بهجة، ولما اشتغلت معاه في نفس اللوكيشن مش متخيلين كمية الراحة اللي أنا فيها ومفيش قلق ولا ضغط، وبكون شغال وأنا مبسوط وعايز اطلع أحسن ما عندي وهو بينقلي الطاقة من أكتر المرات اللي اتبسط وأنا بصور.
وأضاف تيام مصطفى قمر: الكواليس كلها خفيفة ودمها خفيف واحنا حابين بعض وحابين الشغل ومكتوب حلو أوي وأستاذ علي ادريس بذل مجهود كبير وكلنا مركزين أوي وعايزين كل شخص فينا يطلع بشخصية مظبوطة، ولما بيكون فيه مشهد بيني وبين بابا بنقعد شوية قبلها نشوف هنطلعه ازاي وبنشوف علي إدريس رأيه إيه، احنا ماشيين بوجهة نظر المخرج.
