محمد منير: الغناء ما بيسبنيش لحظة.. حتى يوم وفاة أمي دخلت الحمام وغنيت
أعرب الفنان محمد منير عن سعادته بتكريمه بالأمس، من هيئة الترفيه السعودي، في حفل أقيم على مسرح بنش مارك في جدة، وشاركه الاحتفال كل من فرقة كايروكي والفنان أحمد سعد.
محمد منير: التكريم يعني لي ابتسامة مضيئة في حياتي
وقال محمد منير خلال مؤتمر صحفي أقيم على هامش حفله بجدة: بلا مجاملة أنا معملتش حاجة غير إني ركبت الطيارة بس وفي مصر مش بركب طيارة فحسيت إني مسافرتش انا في بلدي بردو، تكريم هنا له معنى وأي تكريم في حياتي له معنى، التكريم تصقيفه في حياتي زيادة ابتسامة مضيئة في حياتي.
وأضاف: أنا واثق إن الأغاني لما بتتردد بتبقى زي الهوا والماية، خصوصًا إن الأغنية العربية لما بتنجح بتوصل لكل حد فينا.
أما عن سر نجاحه، فأجاب محمد منير قائلًا: حب الغناء.. معنديش شغلانة غيره.. أنا بصحى وأنام بفكر معنديش غير الغناء، بتذكر اليوم اللي توفت فيه أمي من كام سنة، فدخلت الحمام لقيت نفسي بغني في لحظة، واتخضيت وقولت الحدث عندي جلل النهارده، الغناء مش بيسبني في أي لحظة، هو حلمي وأملي.
محمد منير: تمنيت التواجد في حفل هاني شنودة لأني جزء من مشواره
وأردف محمد منير: كنت أتمنى أكون متواجد في حفل تكريم الموسيقار هاني شنودة، أنا جزء من مشوار هاني شنودة، جزء أصيل يعني، ويا رب يدينا العمر ونحتفل بالمشوار تاني وتالت ورابع.
أما عن تأثير النوبة عليه، تابع منير: جزء من تكويني الفني غنيت نوبي وصعيدي وجعفري وعبادي، مصر غنية بأنواع فنون كتيرة وانا مكنتش أسير القاهرة بس، أنا غنيت لكل أنواع الفنون، حتى الفن الشعبي.
واستكمل منير حديثه: يسعدني أقول عليه النهارده أخويا وصديقي تركي آل الشيخ، وعلى فريق العمل المنتقى بجدية، وشايف إنهم خلية نحل وأنا تقريبا منضم لعيلتي معاكم ده لو وافقتم أنتم يعني، مشواري كله طعم بيوت وطعم الغنا.
