مصطفى هريدي يكشف تفاصيل أزمته مع إيناس الدغيدي: قالت عني مدمن وشوهت سمعتي واتمسكت في المطار بسببها
تحدث الفنان مصطفى هريدي، عن تفاصيل خلافه مع المخرجة إيناس الدغيدي، بعد تعاونه معها في أول عمل بينهما وهو فيلم مجنون أميرة عام 2009، مشيرًا إلى أنها اختارته لبطولة الفيلم بعدما شاهدته في العرض الخاص لفيلم البيبي دول.
وأكد مصطفى هريدي، أن إيناس الدغيدي هي سبب فشل الفيلم، لأنها لم تروج له بالشكل الصحيح، مشيرًا إلى أنها لم تقدمه ولم تهتم به كممثل في أول بطولة عمل له.
وقال مصطفى هريدي خلال لقائه ببرنامج الستات: إيناس الدغيدي اختارتني من فيلم البيبي دول بعد ما شافتني في العرض الخاص، وكنت رايح لها على أساس إني هقدم دور ومعرفش إنه هيتعرض عليا بطولة الفيلم، والسيناريو كان تأليف مصطفى محرم وكان مكتوب قبل تصوير الفيلم بـ 10 سنين وكان عن قصة الأميرة ديانا، وعجبني الدور ومضيت وبدأت أصور وفرحت بالبطولة المطلقة لأن أي ممثل بيفرح وإيناس الدغيدي ليها اسم برضه.
وأضاف مصطفى هريدي: المشاكل بدأت تحصل بعد ما الفيلم نزل وما عملش حاجة من وجهة نظرها في السنيما، والسبب أن الفيلم ما اتعملوش عرض خاص ولا دعايا واعتمدت على اسمها حتى الأفيشات اللي نزلت عن الفيلم في وشي كان بروفايل واسمي مش مكتوب رغم أني ممثل بتقدمني لأول مرة.
مصطفى هريدي يكشف تفاصيل خلافه مع إيناس الدغيدي
وأوضح مصطفى هريدي: كان وقتها بقى لي سبع سنين في التمثيل يعني مش خبرة بالنسبة لي أني أفهم الحاجات دي، ولكن لما بدأت في المهنة والوسط، عرفت أني ما اتقدمتش بالشكل اللي المفروض تقدم بيه الممثل والنجم لأول مرة لا في الكاست ولا دعايا الفيلم ولا في الاهتمام بيا، والفيلم اتظلم مش مني أنا داخل أعمل دوري والمفروض الشركة المنتجة والمخرجة يقدموني مش أنا اللي شايل المسؤولية ويتقال لي إني أنا سبب فشل الفيلم.
واستكمل: تالت يوم تصوير بلا مبالغة قالت لي أنت مش سينمائي أنت مش عارف حاجة اعمل اللي موجود وأعمل اللي مكتوب ورأيها كان بيمشي وما دتنيش فرصة أعمل حاجة ولا طلعت مني حاجة وقالت لي أنت مش بتاعي أنت بتاع السبكي في اللوكيشن وقدام الناس، يعني أنا كمخرجة بتعامل مع ممثل بشكل معين ومش أنت الممثل اللي أنا عاوزاه، وبعد ما نزل الفيلم والإيرادات ما كنتش بالشكل اللي كانت متوقعاه قالت أني أنا السبب.
وأردفت: وبعد ما الفيلم نزل واتشال من السينما عملت له عرض خاص وعزمت الصحافة والإعلام وبعض الأصدقاء وكلموني من مكتبها وقالوا لي الفيلم فشل جماهيريًا وعاوزين ننجحه إعلاميًا، ووقتها بعت أخويا الصغير يتفرج على الفيلم قالوا له الفيلم كامل العدد أدخل فيلم تاني طلبت مدير السينما وقلت خلي أخويا يدخل دخل لقى القاعة تلتها موجود لأن الفيلم مالوش صاحب والفيلم نازل في العيد.
قالت عني مدمن وده سب وقذف وتشهير
وواصل: قالت عني مدمن وده سب وقذف وتشهير وقالت الكلام ده في 2016 مش في 2009 وقت نزول الفيلم، وكان واضح أنها عاوزة تشوه سمعتي وده ضرني فعلًا وقعدت سنين طويلة وبترشح في أعمال كتير وبترفض بسبب السمعة دي واتعرضت لمواقف بسبب كلامها واتعاملت على أني تاجر مخدرات في إحدى المطارات في دولة من الدول.
