الشناوي: لسه شوية عشان أصنف نفسي بين أساطير حراس الأهلي.. ورجوعي للأحمر أفضل قرار في حياتي
رفض محمد الشناوي، حارس مرمى الفريق الأول لكرة القدم بالنادي الأهلي، تصنيف نفسه بين حراس النادي السابقين، وكشف عن أفضل قرار في حياته.
الشناوي: لسه شوية عشان أصنف نفسي بين أساطير حراس الأهلي
وقال الشناوي في تصريحات تليفزيونية: لن أستطيع تصنيف نفسي بين حراس الأهلي، أنا ما زلت تحت التقييم، هناك أساطير زي عصام الحضري وثابت البطل وأحمد شوبير، لسه شوية عشان أكون موجود في الحتة دي، وأعرف جيدًا أن كل لاعب له وقته، وفي وقت ما لن تكون موجودًا، وأنا حاليا موجود وأقوم بتأدية مهمتي، وطول ما أنا بشارك مع الأهلي والمنتخب يبقى ده وقتي.
وأردف تصريحاته قائلا: تأثرت بوفاة حازم الحديدي لأنه كان بمثابة أخي الكبير وكنا قريبين جدًا، وتفاصيل مرضه كانت صدمة بالنسبة لي وأصررت على الوقوف بجانبه، أصررت على استمراره بالمستشفى ولكن أسرته قررت عكس ذلك، ولو هرجع بالزمن هصمم على موقفي.
وأكد الشناوي: كل الفريق حبايبي وقريب مني، ولا أنسى مباراة أوروجواي، أصعب بطولة حصلت عليها التاسعة عشان جمهور الأهلي، وفي شخص قالي مكنتش هعرف أمشي في الشارع إزاي لو مكنش الأهلي خد البطولة، عشان كده هي أغلى بطولة للجمهور والإدارة واللاعبين.
وأشار: رجوعي الأهلي هو أفضل قرار في حياتي، وليس هناك قرار أندم عليه، محمود الخطيب قيمة كبيرة بالنسبة لي، وأتعلم منه الكثير في المواقف الصعبة، بشوف هدوء وتصرفاته، مؤثر جدا عليا وعلى المنظومة كلها.
واختتم الشناوي: مبهمتش بالسوشيال ميديا، واتعلمت إزاي متأثرش بيها، واشتغلنا على الموضوع ده مع اللاعيبة الفترة اللي فاتت، وقبل مباراة الرجاء الموسم اللي فات قفلنا السوشيال ميديا قبلها بأسبوع، ولكن قبل مباراة الوداد الأخيرة مقفلناش ولكننا امتنعنا عن التفاعل للتركيز.
