أمير كرارة: أنا بكره السوشيال ميديا والناس بتشتم الفنانين ويجروا يتصوروا معاهم
تحدث الفنان أمير كرارة خلال تصريحات إذاعية عن مشواره الفني، ومشاركته في الموسم الرمضاني 2023.
ونرصد لكم أبرز تصريحات أمير كرارة في البرنامج الإذاعي
- أول ما نزل بوستر مسلسل سوق الكانتو اتقال بيقلدوا بيكي بلايندرز، اه إحنا بنقلده، إيه المشكلة لما نعمل حاجة شبهه ما فيه زمن بتاع البريهات والبالطوهات، مش كان فيه مصر ما تيجي نعمل الزمن ده، وعملنا حدوتة تانية خالص.
- قلت لـ هاني سرحان نفسي أعمل حاجة شبه بيكي بلايندر، مشوا الدنيا وما تحبكوهاش واتبسطوا إحنا بنعمل حاجة لطيفة، ما هم بره بيقلدوا برضه.
- فيلم البعبع، اتقال بيقلدوا فان ديزل.. اشمعنى بره بقى له عشرين سنة بيطلع بالجينز والفانلة البيضا وهناك مكسر الدنيا.
- مفيش أحداث في المسلسلات التركي وحاجة مللة وزعيق وصويت، وصعبة أوي.
- جعفر العمدة كسر الدنيا، محمد رمضان نجم كبير ومحمد سامي مخرج عظيم، الاثنين بينجحوا مع بعض وبيعرفوا إزاي يوصلوا حدوتة حلوة للناس.
- كل حاجة في مسلسل سوق الكانتو كانت بحدود حتى الهزار، يعني كنت مضايق أوي وحاسس إني قديم أوي، كنت متضايق من نفسي بالشنب الرفيع.
- سوق الكانتو خد حقه بعد رمضان، وفيه نوعية من الناس اتفرجت وكانوا منبهرين بيه، ولكن رمضان ليه ظروفه والناس بتحب القاعدة واللمة وتوقع الأحداث والأحداث السخنة زي مسلسل جعفر العمدة.
- سوق الكانتو كان حالة مختلفة وعايز اللي يقعد له ويفهمه، وحد قالي اعتبر المسلسل ده حاجة سينيه في تاريخك.
- أحمد السقا كان هيكسرلي فكي في مسلسل هروب اضطراري، وهو محترف في الأكشن ولعبته من قبلنا وهو ملك الأكشن، وعنده ضمير في شغله.
- أنا بكره السوشيال ميديا، وبزعل من الناس اللي بتشتم في الممثلين، واللي بيشتميك يجري عليك يتصور معاك.
- بقول للي بيشتمونا على السوشيال ميديا فكر في حاجة واحدة بس، إن لما تشتمني وابني الصغير اللي شايف أبوه أحسن واحد في الدنيا يلاقي أبوه مشتوم هيزعل أوي، لو مش عاجبك ما تتفرجش، دا أكل عيشنا.
