خلع بالكتف وتمزق بالأربطة.. شيف يستغيث من مطعم سبكترا: تعرضت لإصابة ومش عايزين يديني حقوقي
حرر شاب يدعى إسلام بيومي، يعمل شيف بأحد فروع مطاعم سبكترا بـ مدينة نصر، محضرا يثبت فيه إصابته في أثناء عمله بالمطعم بكسر في الكتف وتمزق في الأربطة.
شاب يستغيث من مطعم سبكترا: كان السبب في عجزي.. ومش عايز يديني حقوقي ولا يصرف عليا علاجي
واستغاث الشاب إسلام بالقاهرة 24، وقال خلال حديثه إنه يعمل في المطعم منذ 5 سنوات بدون عقد عمل أو تأمين صحي، لأنه كان يثق في القائمين عليه.
وأضاف إسلام أنه تعرض لحادث أثناء عمله بالمطبخ الخاص بالمطعم، وتسبب الحادث له في كسر في الكتف وتمزق في الأربطة وتم نقله للمستشفى، بمساعدة أصدقائه في العمل.
وتابع: لما وصلت المستشفى الدكتور قالي لازم تعمل عمليه دلوقتي وهتتكلف 15 ألف جنيه.. إدارة المطعم قالولي لأ.. روح مستشفى حكومي أحسن.. ولما روحت المستشفى مفيش حد سأل عليا تاني.. وعملت العملية على نفقه الدولة.. وبقالي 7 شهور قاعد في البيت بتعالج وبعمل جلسات علاج طبيعي.
وأردف: كل ما أحاول أوصل لإدارة المطعم مش بلاقي رد منهم عليا، ولا أدوني فلوس لعلاجي، وبقالي 7 شهور بصرف على نفسي وبستلف فلوس من أصحابي، عشان أعرف أصرف على زوجتي وابني، وعرضوا عليا لما أرجع الشغل هاخد نص المرتب، لأن بعد الإصابة مش هشتغل زي الأول.
واختتم: كل اللي أنا عايزه أرجع الشغل تاني بالمرتب بتاعي الأساسي، وإدارة المطعم تصرف على علاجي، لأن أنا بقيت مديون ومش عارف أجيب فلوس منين تاني، ومش عايز أستلف من حد تاني.
