ميرهان حسين: والدتي نفسها أتجوز أحمد عز.. وأرفض أكون زوجة ثانية ولو الخلفة مش من نصيبي هعيش سعيدة
كشفت الفنانة ميرهان حسين، مواصفات فتى أحلامها، مؤكدة أنها تبحث في الرجل عن الأمان والاحترام، كما تحدثت عن علاقتها بوالدتها وإمكانية اعتزالها الفن مرة أخرى.
وقالت ميرهان حسين خلال لقائها مع الإعلامية ياسمين عز في برنامج كلام الناس المذاع عبر شاشة إم بي سي مصر: والدتي نفسها أتجوز أحمد عز لأنها بتحبه وهي عايزاني أتجوز ودا هدفها في الحياة لدرجة بتأجل الفرحة لحد ما أتجوز، ووالدي مش عايزني أتجوز ولا بيضغط عليا وشخصيتنا قريبة من بعض، ومع الأسف المجتمع بيشوف الست اللي متجوزتش عانس ومع ذلك مش بيفرق معايا كل التصنيفات دي.
وواصلت ميرهان حسين: الجواز مرتبط بالشخص ولما ألاقي شخص مناسب ودا نصيب ولو ربنا مش كاتبلي أخلف ومش من نصيبي هعيش وهسعى أكون سعيدة، ولازم الراجل اللي هيكون شريك حياتي يكون بيحترم نفسه ويحترمني وآرائه محترمة وبما أنه راجل هيكون سند وأمان وضهر، ولو العلاقة مفيهاش أمان متبقاش علاقة صحية، ودا نادر بس أكيد موجود، وأنا لا يمكن أقبل أكون زوجة ثانية.
ميرهان حسين: ممكن أعتزل الفن من أجل زوجي المستقبلي
أما عن إمكانية اعتزالها الفن من أجل زوجها المستقبلي، علقت ميرهان حسين قائلة: أنا عايزة الفن والزواج مع بعض ولكن لو لقيت الراجل محترم وبيحبني وبحبه ويعرف ربنا ودمه خفيف وابن ناس، وهيحققلي السعادة ممكن أسيب الفن عشانه، بشرط يكون قراري مش مفروض عليا؛ لأن حبي للفن جزء مني.
