موقف نادر لـ رجاء الجداوي مع خادمتها: قصت رموشها عشان تكون زيي |نوستالجيا
كشفت الفنانة رجاء الجداوي، في فيديو سابق لها، موقف غريب لها، مع إحدى الخادمات اللاتي عملن في بيتها، كما تحدثت عن فكرة التعامل بشكل عام، بين الخادمات وأصحاب المنازل.
وقالت رجاء الجداوي خلال لقاء تليفزيوني قديم لها: في بعض البنات الخادمات، بيكونوا فاكرين إني عشان رجاء الجداوي وممثلة وكده، إن بيتي ده هيقابلوا فيه كل الممثلين.
وتابعت: فـ تقوم واحدة منهم الصبح تسأل هو عادل إمام مش جايلنا النهاردة؟، وتقعد مع حد تاني في البيت وتقول ده أنا جاية عشان أشوفهم، هي فاكرة إنها هتتشنكل في حسين فهمي وممثلين وكدة، فهي بتكون جاية عشان المنظرة بتاعت الفنانين.
وأضافت رجاء الجداوي، راويةً موقف آخر مع إحدى الخادمات: مرة جابوا لي بنت صغيرة عندها 16 سنة، دخلت عليا وأنا بحط رموش صناعية، وبعد ما حطيتهم كنت بقصهم شوية بالمقص، وهي بصتلي مبهورة باللي أنا بعمله، بس متكلمتش ولا كلمة وخرجت.
استكملت رجاء الجداوي حديثها: وجت البنت تاني يوم ببص في وشها لقيت عينيها فيها حاجة غلط، مش لاقية رموشها، وفكرت البوتجاز هب فيها، بسألها مالك قالت لي ما أنا قصيتهم زيك يا ستي عشان يطولوا، حلقت عينيها.
رجاء الجداوي: ريقنا بينشف وإحنا بنعلم الخادمات
وأردفت رجاء الجداوي: إحنا بنتعامل مع شخصيات بسيطة جدا وخام، لسه بتعلميهم وبتلبسيهم، بس المشكلة إن أنا عموما أسلوبي في البيت أنا وبنتي، إنها بتقولي أجيب لحضرتك شاي، لكن الخادمة تقولي أجيبلك شاي.. فـ الأسلوب نفسه بيخليني أقولها لأ مش عايزة، فـ على ما نعلم واحدة، ريقك بينشف.
