ميمي جمال: اشتغلت بمسرحية مدرسة المشاغبين بدل سهير البابلي.. وأنا وحسن مصطفى كتبنا ثروتنا لبناتنا علشان يرتاحوا
كشفت الفنانة ميمي جمال عن مشاركتها في مسرحية مدرسة المشاغبين بدلًا من الفنانة سهير البابلي، والتي أُصيبت بمرض في عينيها وقت عرض المسرحية مما جعل ميمي تشارك بدلًا عنها.
وقالت ميمي جمال في حوارها مع الإعلامي عمرو الليثي، في برنامجه واحد من الناس: اشتغلت في مسرحية مدرسة المشاغبين بدل سهير البابلي علشان جالها مرض في عينها وقت العرض، والمنتج سمير خفاجي أصر إني أعمل الدور بدل سهير بدل ما نوقف العرض لحد ما ترجع.
وأضافت ميمي جمال: عملت 3 بروفات مع الملقن، واشتغلت مكانها 15 يوم، وسمير خفاجي كان بيصفق لي، وقالي شطارة والله يا ميمي.
وأضافت ميمي جمال، أنها عملت مع الفنان سمير غانم في المسرح العديد من المرات، مضيفة: اشتغلت مع سمير غانم في المسرح أنا وحسن في مسرحية دو ري مي فاصوليا، ولازم اللي يشتغل معاه يكون صاحي ومركز، وهو كان بيقول عليا عمود الكردان بتاع المسرحية.
ميمي جمال: أنا وحسن مصطفى كتبنا ثروتنا لـ بناتنا علشان يرتاحوا
كما كشفت الفنانة ميمي جمال أنها وزوجها الفنان حسن مصطفى، تنازلا عن ثروتهما لـ بناتهم على حياة عينهم قبل وفاة حسن مصطفى، قائلة: أنا وحسن كتبنا كل ثروتنا في حياتنا كلها لبناتنا علشان يرتاحوا ويفرحوا، وأنا لو نكدت على جوز بنتي هينكد على بنتي، أنا مبتدخلش في حياتهم وأنا مصاحباهم ولو هو متضايق من بنتي بييجي يحكيلي.
