مي كساب: مجد القاسم اختارني لأني صوت فيروزي.. ومكنتش بفكر في التمثيل
تحدثت الفنانة مي كساب عن بداية دخولها عالم الغناء بالمشاركة مع المطرب مجد القاسم، وتحولها من مطربة إلى ممثلة بعد نجاح ست كوم تامر وشوقية مع الفنان أحمد الفيشاوي.
وقالت مي كساب في تصريحات تليفزيونية، إنها لم تفكر في دخول التمثيل مطلقًا، مشيرة إلى أنها تحولت من مطربة دخلت إلى التمثيل، لـ ممثلة دخلت إلى عالم الغناء، موضحة: حصلي حاجة غريبة مبتحصلش لحد، أنا تحولت من مطربة مثلت، لـ مثلة هتغني وده فجأة من عند ربنا، ولما بدأت الغناء مكنش في دماغي التمثيل أبدا، والتمثيل كان حاجة أبعد من خطتي وطموحي لنفسي.
مي كساب: بدأت الغناء بالمشاركة في ألبوم المطرب مجد القاسم
وأكدت مي كساب، أن دخولها عالم الغناء كان عن طريق المشاركة في ألبوم جديد لـ المطرب السوري مجد القاسم، وأوضحت أن المخرج ياسر سامي نصحها بـ غناء أغاني أخرى ليست رومانسية، وأشارت إلى أن أول كليب لها كانت أغنية بعنوان “شيل ده من ده يرتاح ده عن ده” من تأليف أيمن بهجت قمر.
وأضافت مي كساب: مجد القاسم كان بيدور على صوت فيروزي في الألبوم بتاعه وأنا واحدة بتغني رومانسي، ومكنش في دماغي أني هقول شيل ده من ده يرتاح ده عن ده، والمخرج ياسر سامي قالي الألبوم ده مش هيأكلك عيش، أنتي لازم تشوفيلك حاجة شبهك لآنك مش البنت الكيوتة.
وأكملت: كلمت أيمن بهجت قمر وقولته على كلام ياسر سامي ليا، أيمن قالي في أغنية لو كملت يا رب تبقى من رزقك، بعدها على طول كلمني وسمعني الأغنية، وعملنا أغنية شيل ده من ده يرتاح ده عن ده، وحققت النجاح الكبير ده والوطن العربي أتقلب عليا والناس قالت مين المطربة الجديدة دي.
مي كساب: والدي كان شايف أني ممثلة وأحمد الفيشاوي هو من رشحني لـ ست كوم تامر وشوقية
وكشفت مي كساب، عن بداية دخولها لـ عالم التمثيل، مشيرة إلى أن والدها كان يرى أنها تستطيع الدخول في التمثيل، موضحة: والدي كان شايف أني ممثلة، واترشحت في دور مع عمرو سعد وحنان مطاوع وسهير المرشدي وماجد المصري ومسلسل مليان أساتذة كبار.
وأكدت مي كساب، أن الفنان أحمد الفيشاوي هو من رشحها لـ دور شوقية في ست كوم تامر وشوقية، إذ قالت إنها تلقت مكالمة هاتفية منه بخصوص الشخصية، متابعة: جالي مكالمة من حد بيقولي أنا أحمد الفيشاوي قولتله مين، قالي أنا الممثل وعايزك تمثلي معايا في ست كوم إنتاج شريف عرفة وتعالي أعملي كاست.
وأضافت: روحت وقتها كان أحمد مكي هو اللي هيخرج ست كوم وعملت كاستينج واتقبلت وبعدها نجح النجاح الكبير ده، ومن هنا جت إنطلاقتي في التمثيل ونسيت أني مطربة.
وعن المشاركة مع الفنان أحمد عز في فيلم 365 يوم سعادة، قالت مي كساب: أحمد عز نجم كبير وموهوب وبيعامل زملائه بكل أحترام وبيحب شغله جدا واستفدت منه جدا.
كما أعربت الفنانة مي كساب عن سعادتها بنجاح مسلسل اللعبة، والذي عرض منه 4 أجزاء وحقق نجاحًا كبيرًا، مؤكدة أن العمل كان سبب في عودتها للساحة الفنية مرة أخرى بعد غياب 4 سنوات بسبب الإنجاب، متابعة: اللعبة من المسلسلات اللي بتتعرض بره الموسم وبتنجح نجاح ساحق، ومعتز التوني من أكثر المخرجين في مصر اللي بحب الشغل معاه.
وأضافت: قبل ما أشارك مع شيكو وهشام ماجد في مسلسل اللعبة، كنت من الفانز بتاعهم وكان نفسي أمثل معاهم من زمان، مضيفة: لما كنت بتفرج عليهم كان نفسي أدخلهم الشاشة وأمثل معاهم، وبحب مدرسة الكوميديا بتاعتهم جدًا.
وعن مشاركتها في مسلسل جعفر العمدة بطولة الفنان محمد رمضان، قالت: شخصية ثريا جاتلي من محمد سامي وهو بيكتب كلمني وقالي أنا بكتب الشخصية مفيش حد في مصر يعملها غيرك، وأنا طبعا بالنسبالي محمد سامي مخرج مهم جدا وكان فارق معايا في تاريخي أني اشتغل معاه.
