رضا البحراوي: حسبنت على نجم كبير بسبب عدم التزامه بالاتفاق.. وبستأذن محمد عادل إمام قبل ما أغني مسلسلات
تحدث المطرب الشعبي رضا البحراوي عن علاقته بالفنان محمد عادل إمام، مؤكدًا أنه صاحب فضل عليه على حد قوله، وذلك بعدما كان اتفق مع نجم كبير على الغناء في أحد المسلسلات، ولكن هناك من تعاقد على الأغنية بدلًا من البحراوي، الأمر الذي أثار استيائه.
وقال رضا البحراوي، خلال لقائه مع الفنانة إسعاد يونس في برنامجها صاحبة السعادة المذاع عبر شاشة قناة DMC: ممكن أكون مخلص الغنوة وفرحان وحد تاني يجي يعرض فلوس وياخدها، حصلتلي مرتين ومنهم مسلسل ناجح أوي، وكنت اتفقت مع النجم الكبير اللي كان في العمل وبعدين وأنا في الطريق كلمني وقالي بلح، قولتله حسبي الله ونعم الوكيل ولفيت ورجعت، وقعدت بعدها سنة مفيش شغل.
وتابع رضا البحراوي، معربًا عن امتنانه الكبير للفنان محمد عادل إمام: بعد موقف المسلسل لقيت مدير أعمال محمد عادل إمام قالي الفنان عايز يقعد معاك، روحت قعدت معاه ووقتها كان في مسلسل هوجان ولقيته إداني تتر بداية ونهاية وسجدت على الأرض وحمدت ربنا، وقالي أنا مش هسيبك علشان أنت اتظلمت كتير.
رضا البحراوي: محمد عادل إمام صاحب فضل عليا
وأضاف رضا البحراوي: جالي مسلسلات كتير أوي، ولكن لازم أستأذن منه الأول وده حب وبيديني رأيه ويقولي ده أه وده لا، وهو كان حببني أوي من قبل ما أروح له، وتعاون معايا ووقف جمبي، وأنا من حبي بقيت أقوله أنا مش عايز حاجة منك من أدبك واحترامك وكفاية أنه نصرني قدام الناس وخلى ليا نفس، وهو صاحب فضل عليا.
