شقيق علاء ولي الدين عن علاقة هنيدي بالراحل: ليه مستغربين من الوفاء؟
كشف معتز ولي الدين شقيق الفنان الراحل علاء ولي الدين تفاصيل العلاقة الوطيدة، التي جمعت بين الراحل والفنان محمد هنيدي.
وقال معتز شقيق علاء ولي الدين في تصريحات خاصة لـ القاهرة 24: محمد هنيدي وعلاء ولي الدين إخوات وأصدقاء وحبايب وكل حاجة في الدنيا، طلعوا ووصلوا وشقيوا مع بعض، وعملوا كل حاجة مع بعض، ومحمد هنيدي لسه قافل معايا التليفون دلوقتي.
وتابع شقيق علاء ولي الدين: مستغربين ليه من الوفاء، هل الوفاء بقى عملة نادرة، ده وفاء طبيعي، والمفروض إن هي طبيعية في كل البنى آدمين، وهنيدي وعلاء ناس متأصلين، إحنا مش هنخلط الوحش بالحلو، والوفاء الصفة العامة، والمفروض بيتولد مع البنى آدم بالفظرة، وربنا أمرنا بكده، وهي مش حاجة غريبة ديه حاجة طبيعية.
وأردف معتز شقيق علاء والي الدين: أنت وصحابك بتسألوا على بعض لو حد تعب أو حصلوا حاجة بتجروا عليه، وإوعى تقول على صفة الوفاء والحب والرحمة والمودة اللي بينا ديه إنها حاجة مش طبيعية، وده اللي بيودي المجتمع في داهية، والوفاء بين الأصدقاء يفضل طول عمر والحياة، لغاية ما نموت ولغاية ما ننبعث يوم القيامة.
محمد هنيدي وعلاء ولي الدين
ونشر منذ قليل الفنان محمد هنيدي صورة لـ الفنان الراحل علاء ولي الدين، كما طالب الدعاء لصديقه الفنان علاء ولي الدين، مشيرًا إلى أنه توفي في أول يوم بعيد الأضحى المبارك مثل هذا اليوم، وذلك خلال حسابه الرسمي بموقع التواصل الاجتماعي فيس بوك، قائلًا: أبو قلب أبيض.
