هالة صدقي: من خوفي على نجاح شخصيتي في أرابيسك بعدت عن الأدوار الشعبية 20 سنة
أكدت الفنانة هالة صدقي أنها ابتعدت عن الأدوار الشعبية لمدة 20 عاما، خوفًا من تكرار شخصيتها في مسلسل أرابيسك، خاصة بعد النجاح الكبير الذي حققته الشخصية، بجانب حديثها عن اعتمادها دور الأم في أعمالها الفنية.
وقالت هالة صدقي في حوارها مع الإعلامي معتز الدمرداش، في برنامجه ضيفي، المذاع عبر قناة الشرق: في مجالنا ممكن أكون بعرف أمثل بس لكن معرفش أدير نفسي، أنا معنديش حد يديرني وبعدت عن الأدوار الشعبية بعد أرابيسك، شخصية توحيدة في أرابيسك عمل ضجة كبيرة جدًا ومن خوفي على نجاحه وإني أكرر الشخصية تاني بعدت 20 سنة، وده كان غلط في حياتي كبير إني بعدت عن الأدوار الشعبية.
هالة صدقي: أنا كبرت ومش هنضحك على الجمهور
أما عن حصرها في دور الأم في أعمالها الفنية، فعلقت هالة صدقي قائلة: أنا عملت أم لـ محمود ياسين وأنا عندي 19 سنة في فيلم الأفيال، وأنا طبيعي كبرت ومش صغيرة ولكن مش لدرجة إني أكون أم أحمد فهيم في جعفر العمدة، ولكن مش هنضحك على الجمهور هو شايفني من أمتى لـ أمتى، وأدوار اتحرقت خلاص ولازم أنقل المرحلة العمرية التانية ومش لازم البطلة تكون حسناء.
هالة صدقي: أنا راضية عن مشواري الفني وبفكر يبقى أطول
وتابعت هالة صدقي: أنا راضية عن مشواري الفني جدًا وكان ممكن يكون أفضل، بس أنا بفكر في أنه يبقى أطول، ويمكن أنا حاطة في دماغي هدى سلطان ومن وأنا صغيرة شايفة الخط بتاعها ماشي إزاي، لأنها فضلت لآخر دقيقة نجمة، واتصالحت مع نفسها لما طلع شباب صغير معاها مشيت مع الموجة.
وأضافت: الأستاذة كريمة مختار فضلت نجمة لآخر لحظة وكانت بطلة في مسلسل يتربى في عزو، مش الأم بس يعني بيبقى في صراع في دور الأم والمخرجين مش بيهتموا أوي.
هالة صدقي: اعتذرت عن فيلم يا دنيا يا غرامي ورجعت تاني
كما كشفت الفنانة هالة صدقي عن اعتذارها عن فيلمها الشهير يا دنيا يا غرامي قائلة: أنا كل دور بعمله بلاقي هالة جواه، وروحي محطوطة في كل دور بعمله، يعني مثلًا دوري في فيلم يا دنيا يا غرامي كان مظلم وكئيب واعتذرت عنه ورجعت تاني، والمخرج مجدي أحمد علي كان أول تعامل معاه وسمحلي أحرر الشخصية.
