ابنة أحمد راتب: والدي في بداياته كان بيعمل أداء صوتي بـ 2 جنيه.. ورحل ولم يترك لنا دين غير مدفوع
كشفت لمياء، ابنة الفنان الراحل أحمد راتب، بعض الصعوبات والمواقف التي واجهت والدها في بداياته الفنية، إلى جانب حديثها عن اللحظات الأخيرة قبل وفاته.
وكتبت لمياء أحمد راتب، منشورا عبر حسابها الشخصي بموقع فيسبوك جاء فيه: اسمحوا لي أسرد لكم مواقف بسيطة نفسي الناس كلها تعرفها عن أبويا الله يرحمه.
أضافت لمياء راتب: بابا أول لما أتجوز ماما كان لسه مش معروف، ومش بيشتغل بالتمثيل بشكل منتظم، كان بيروح مبنى الإذاعة يفضل قاعد من 9 الصبح لحد الليل عشان لو حد طلب أداء صوتي يعمله وياخد عليه 2 جنيه.
لمياء راتب: أبويا توفي ولم يترك لنا دين غير مدفوع
تابعت لمياء راتب: في ليلة شديدة البرودة عثر على جرو صغير في الشارع واخده معاه البيت، ولما لقاه بيعيط عشان قاعد في الصالة لوحده أخد بطانية وخرج نام جنبه، مشهد سقوطه في البحر بالليل في فيلم جزيرة الشيطان كان متصور في شرم الشيخ في شهر يناير، وقت عرض مسرحية الزيارة انتهت.
استكملت لمياء راتب: أضطر إلى الذهاب لعرض الدور المسرحي والالتزام، بمسؤوليته الدور كان كوميدي، وهنا أشير لالتزامه بمسئوليته تجاه جمهور دافع فلوس تذاكر مسرح، وجدير بالذكر أن والده توفي ليلًا وكان سيدفن صباحًا،فكان يخرج يبكي في الكواليس بعد كل مشهد ثم يجمع رباطة جأشه ويخرج مرة أخرى على المسرح.
واصلت لمياء راتب حديثها قائلا: وقت عرض مسرحية الزعيم وفي طريقه للمسرح، توقفت الحركة المرورية تمامًا وذهب للمسرح مشيًا على الأقدام من ميدان الرماية حتى مسرح الهرم، أبويا توفي ولم يترك لنا حتي فاتورة كهرباء أو دين غير مدفوع.
وروت لمياء راتب، بعض المواقف الإنسانية الطريفة التي عاشها أحمد راتب، قائلة: مرة كان قاعد في النادي وجات عصفورة مش شايفة الباب الزجاج خبطت فيه وقعت على الأرض، جابها البيت وفضل يراعيها لحد لما قدرت تطير.
واختتم لمياء راتب حديثها قائلة: كان بشتري خس مخصوص ويحوش الورق بتاعه عشان أختي تديه للسلحفاة بتاعتها تأكله، لما كان يجيبلي حاجة بحبها حتى لو كيلو برتقال، لازم يأخذني من أيدي يوريها لي عشان يشوف الفرحة في عيني، أخر حاجة بابا عملها في البيت في قمة ألمه وقبل وفاته بخمس أيام، وفي وقت انتظار عربة الإسعاف، قبل ذهابه بالإسعاف للمستشفى مباشرة، غسل وقطع تفاحة لحفيده حمزه لمجرد أنه قال قدامه عايز تفاحة، أبويا قبل ما يتوفى بأسبوع كان واقف يمثل على المسرح.
