صاحبة أغنية مخصماك: الغناء بالنسبة لي مش مهنة.. وأنا مغربية مش مصرية
تحدثت الفنانة المغربية نوال عبد الشافي عن كواليس أغنية مخصماك التي حققت نجاحًا ملحوظًا خلال الفترة الماضية، مشيرةً إلى أنها تلقت العديد من التعليقات الإيجابية.
كواليس أغنية مخصماك
وقالت نوال عبد الشافي خلال تصريحات خاصة لـ القاهرة 24: الناس كانت بتكتبلي في الكومنتات مصرية وافتخر واتبسط جدًا؛ لما غنيت بلهجة الناس صدقتني.
وأشارت نوال إلى أنها لم تعش بمصر من قبل، ولكن كانت تزور مصر على مدار حياتها، من قبل تفكيرها في خوض مجال الغناء.
وأردفت نوال عبد الشافي: في الفترة الأخيرة اللي قررت أعمل فيها الأغاني، الشركة قالولي انزلي الشارع اسمعي الناس بتتكلم ازاي، وبعض الأحيان بتنجح الأغنية مع سن معين، لكن أغنية مخصماك نجحت مع كل الناس الصغيرين والكبار والستات والرجال.
وتابعت نوال: احنا ممكن ناخد حقنا بانبساط ومن غير نكد، وبنقولهم لازم تفهم الست أكتر، لو فهمتها وخليتها مبسوطة ومتدلعه هتديلك كل حاجة حلوة.
وأوضحت نوال عبد الشافي أنها مغربية الجنسية، درست المرحلة الابتدائية والثانوية في المغرب، ومن ثم استكملت دراستها في إسبانيا وفرنسا، وقالت: بحب كل حاجة فيها تعامل مع الناس وجنسيات مختلفة، وكنت مستمتعة جدًا في شغلي ده وحققت نجاح حلو، وبعدين عملت من زيت الأرجان براند بتاعي وهو نادر جدًا ومش موجود غير في المغرب، وعملت منه برفان وبعد ما نجحت فيه قولت لازم أعمل حاجة كان نفسي أعملها من زمان وهي إني أغني للناس وأشوف رد فعل الناس.
وأضافت نوال عبد الشافي: أنا شخصية ملولة، ولما التيم بتاعي بيقولي يلا، قولتلهم متثقوش فيا ممكن في أي وقت اقولهم مش لاعبة، بالنسبة لي الغناء مش مهنة هو بالنسبة لي حاجة بحبها.
