داليا المشردة بالمهندسين: الإدمان خسرني شغلي وحياتي بعد ما كنت سيدة أعمال وعندي بيوتي سنتر
من أخصائية تجميل إلى مشردة في شوارع المهندسين.. قصة مأساوية عاشتها سيدة تدعى داليا، بعد أن تغيرت حياتها من سيدة أعمال لديها مركز تجميل في بعض الفنادق الفاخرة إلى ضحية من ضحايا الإدمان تعاني من المشكلات أبرزها زواجها من شخص استولى على جميع أموالها.
قصة داليا مشردة المهندسين
وقالت داليا: عشت طول حياتي وحيدة بعد وفاة أمي، ومكنتش أعرف حاجة عن والدي ولا عمري شوفته واتجوزت في سن صغير كان عندي 14 سنة وقتها من شخص أكبر مني بـ 27 سنة وأنجبت طفل وبعد 8 سنين انفصلت عنه وسافرت إلى شرم الشيخ للعمل في مجال التجميل.
وأضافت داليا: اشتغلت في مجال التجميل لمدة 18 سنة وقررت أفتح مشروع صالون تجميل خاص ليا، بيوتي سنتر، وبعد فترة المشروع كبر وفتحت أكتر من فرع في مناطق سياحية في شرم الشيخ وفي منطقة مصر الجديدة.
وأضافت داليا: تعرفت على شاب كان شغال معايا في مركز التجميل بتاعي وحصل بنا قصة حب كبيرة وتزوجته واكتشفت إنه يتعاطي المخدرات وأقنعني بأن المخدرات هتساعدني في الشغل وخلال شهور أدمنت البودرة لحد ما فلوسي خلصت وكل حاجة راحت مني.. مبقاش معايا ولا جنيه وكل حاجة اتسحبت من إيدي.
وأشارت داليا: بعد ما خسرت فلوسي اضطريت أقفل فروع صالون التجميل الخاص بي لعدم قدرتي على سداد الإيجار المستحق، مختتمة: بقيت مشردة في الشوارع عشان ماليش حد.. ولقيت نفسي من حال لحال ولا عارفة أشتغل ولا أجيب فلوس.. حتى إخواتي رفضوني وقالولي محدش هيصرف عليكي ولا هيستحملك.
