كونوا رفقاء بينا.. وفاء عامر: التمثيل ممرض وبيهد الحيل وإحنا بنشقى
تحدثت الفنانة وفاء عامر عن صعوبات العمل في مهنة التمثيل، مشيرة إلى أن التمثيل متعب وممرض ويهد الحيل.
وقالت وفاء عامر خلال لقائها في برنامج الستات: التمثيل ممرض ومتعب وبيهد الحيل، ولو الواحد بيروح لدكتور نفساني علشان موضوع مضايقه المفروض أروح كل ربع ساعة لدكتور علشان الشخصيات والمشاهد بتعمل قشور لحد ما بتعمل زلطة عند الممثل ويا رب اللي بيبسمعوني يكونوا فاهمين، وإحنا بنحبكم وبنحب اللي بنقدمه ليكم فكونوا رفقاء لأن ساعات الجمهور بيكون قاسي وأنا بحب الشغلانة دي وبحترمها.
وأضافت وفاء عامر: قلة قليلة غير مسؤولة بتأذي الفنان نفسيًا علشان تهده في معنوياته، وأنا أبان أني طيبة لكن أنا قوية وما بنكسرش غير لربنا لأني واثقة في نفسي وفي ربي قبل نفسي، وقبل كل عمل بكون عارفة أن وراه هدف بيصحح من وضع أو يحسس البني آدمين أننا بنعمل العمل ده فداكوا أو لأننا حاسين بمعانتكم.
واستكملت وفاء عامر: البهدلة والمرمطة والشقى والتعب بيعملوا بني آدم، لكن في ناس عاوزة تبدأ من حيث انتهى الآخرين، فأنت تعبت علشان يكون عندك عربية وتلاقي عيل وعيلة عاوز يركب العربية قبل ما تاخدها خد من الوقت والمجهود والصدمات والشقى والمرمطة لأن في ناس في عز الشتا متغطية، وإحنا تحت المطر وفي ناس لابسة تقيل وإحنا لابسين صيف علشان المشهد عاوز كده فاحنا بنشقى في شغلانة الفن.
