عايدة رياض: اتعودت على الوحدة ونفسي أحب واتحب.. ومحرم فؤاد ضربني في الخطوبة ومحستش معاه بالأمان
حلت الفنانة عايدة رياض ضيفة على الإعلامي عمرو الليثي في برنامجه واحد من الناس، وتحدثت خلال اللقاء عن تفاصيل حياتها الشخصية وسنوات زواجها من الفنان محرم فؤاد.
ونرصد لكم أبرز تصريحات عايدة رياض في برنامج واحد من الناس:
- فيلم أحلام هند وكامليا زود المشاكل بيني وبين محرم فؤاد، وكان متفق معايا فلمين فقط واقعد في البيت، وبعد الفيلم عملت مسرحيات وابتديت أرجع البيت متأخر.
- بابا جاله فشل كلوي وكنت مزنوقة ومحتاجة فلوس، ولكن محرم فؤاد موقفش معايا، وبعت لكابتن حسن شحاتة وكان في دبي وبعتلى 5000 دولار، فاتصدمت وحسيت إني لازم أعمل فلوس تكون أمان لحياتي.
- كان في غيرة فنية بين عبد الحليم حافظ ومحرم فؤاد.
- محرم فؤاد كان بيحب ميرفت أمين وسافر ورجع لقاها اتجوزت عمر خورشيد، وكان هيتجوز نيللي.
- طلع عليا شائعة إني اتجوزت أحمد بدير وقت عرض مسرحية تكسب يا خيشة، وكنت هسيب المسرحية بسببها.
- أنا عقلانية واتعودت على الوحدة لكن نفسي احب واتحب.
- عدم إنجابي من عند ربنا هو له حكمة في ذلك، لكن أنا ربيت ولاد إخواتي.
- اتجوزت محرم فؤاد بعد علاقة حب فاشلة بسبب اختلاف الأديان.
- اتخطبت لـ محرم فؤاد علشان أغيظ حبي الأول، وبعدين حبيت محرم جدًا وكان الفرق بينا 20 سنة واستمر زواجنا 13 سنة، هو فنان عظيم ورجل مصري جدع، لكن مع العشرة اتصدمت في بعض الأشياء، ومحستش معاه بالأمان.
- محرم فؤاد ضربني علقة سخنة في الخطوبة لما كنا في لندن، بسبب حبي الأول بعتلي حد من أصحابه لأنه كان داخل الجيش، وبعتلي خطاب على أنه أخويا، وطلب مني ارجعله، ومحرم سمع المكالمة وجن جنونه وضربني قدام صديقه اللبناني.
