علي الحجار: مدحت صالح لم يضف جديدا في مشروع الأساتذة.. والوزيرة قالتلي إحنا هنراضيك
كشف الفنان علي الحجار تفاصيل لقائه اليوم مع وزيرة الثقافة لمناقشة مشروع 100 سنة غنا.
وقال الحجار في تصريحات تلفزيونية: مشروع 100 سنة غنا اتكلمت عنه من 2002 ومفيش سنة عدت إلا لما اتكلمت عنه وعن أهميته، وهو توثيق لتاريخ الأغنية ومشروع كبير لا أستطيع إنتاجه بمفردي، ولم أطلب أجرا لنفسي حال تنفيذه.
وأضاف الحجار: لما لقيت مؤتمر صحفي بيتعمل للفنان مدحت صالح بيقول نفس الأفكار اللى قلتها هي هي بالظبط بدأت اتكلم وأقول ده مشروعي، وبعد لما خلصت حفلتي ونجحت رغم أن مكنش فيه أي دعاية إعلامية، لما رجعت البيت كانت حفلة مدحت صالح بتتعاد فلقيت كل اللي كان بيتقال إن مشروع الأساتذة هيتناول المطربين القدامى وعمل الألحان بتوزيعات معاصرة لا لقيت توزيعات جديدة ولا ألحان جديدة فقلت الحمد لله إنه مخدتش مشروعي ولا أضاف أي جديد ومفيش جديد في توزيعات الأغاني وأنا هقدم مشروعي 100 سنة غنا.
وتابع: أنا أبويا محفظني التراث وعارف الموضوع هيتعمل إزاي والمسألة مش إني أعمل حفلة وأغني فيها، شوفنا مطربين كتير بيغنوا للعندليب وفايزة وشادية وأم كلثوم، أنا عارف المشروع هيتعمل إزاي؟ ووزيرة الثقافة الدكتورة نيفين الكيلاني لما قابلتها قالت لي احنا هنراضيك وهتعمل مشروع 100 سنة غناء زي ما أنت عايزه وكل الأوركسترا اللي تطلبها هنوفرهالك.
