حنان شوقي عن صورة إيمان البحر درويش: الدنيا فانية وكدابة.. والفنان بالنسبة لي أخ أكبر
علقت الفنانة حنان شوقي على صورة الفنان إيمان البحر درويش، التي نشرتها ابنته أمنية مؤخرًا وظهر فيها بشكل صادم لمعاناته صحيًا.
وقالت حنان شوقي لـ القاهرة 24: هي دي الدنيا كدة فانية وكدابة، اعملوا بضمير بقى وامشوا ورا حق الله وقولوا الحقيقة وانشروا الحب وكفاية كره وبغض وبلطجة وهبد وسكاكين وكفاية مدافع وهبل، حببوا الناس في بعضها بقى يا ناس كفاية الدنيا فانية اعملوا حالة حب، الناس بقيت مش طايقة كلمة حلوة كله ضرب ضرب مفيش شتيمة على رأي علاء ولي الدين.
وأكدت حنان شوقي أنها لا تخشى كبر السن أو العجز والمرض، قائلة: أنا أخاف أظلم حد وأخاف ما قولش كلمة الحق وأخاف أقول كلمة مش نابعة من قلبي وأخاف أتجاوز حدودي، لأن العمر والسن والحياة مكتوبين عند ربنا وربنا يسترها علينا دنيا وآخرة.
حنان شوقي: إيمان بالنسبة لي أخ أكبر
وتابعت: إيمان البحر درويش كان بالنسبة لي أخ أكبر، وده اللي وأنا في إعدادي كنت بسمع أغانيه ومن الناس اللي حبناهم وكنا بنسمع شرايطهم، واتعلمنا منه المعاني الحلوة والجمل اللحنية الحلوة وإيمان قيمة كبيرة، ولما نشوف صورته لازم نقف ونقول الدنيا رايحة فين، الدنيا كدابة يا إما تعمل فيها حاجة بجد تقعد لك في حياتك يا إما تعمل ستوب.
واستكملت: لو الواحد عنده ضمير الحياة هتكون لذيذة، ولو كل واحد عايز يحط رجله على رقبة التاني علشان يطلع نبقى عايشين في غابة، لأن اللي بيفضل هي الكلمة الصادقة والعمل الصادق والمعاملة والأخلاق الكريمة بينك وبين الإنسان، وللأسف كلمة الحق بقيت غالية وصعبة على الناس.
