محمد أنور: اشتغلت مع نجوم كبار خدت من شعبيتهم.. والإيحاءات كانت كلمتين في فيلم مستر إكس
تحدث الفنان محمد أنور عن تجربته السينمائية الأخيرة في فيلمي البعبع ومستر إكس، مؤكدًا أنه حرص على اختيار أعماله السينمائية، بجانب تعليقه على الانتقادات التي طالت فيلم مستر إكس بسبب وجود إيحاءات جنسية.
وقال محمد أنور خلال لقائه في برنامج الراديو بيضحك: كنت متوقع ومستني ردود الأفعال، وأنا بقالي كتير جدًا معملتش سينما، وناس كتير كانت بتلوم عليا وتقولي أنت مش متواجد وناس كتير هتسبقك، والمفروض تبقى موجود والشغل بيجيب شغل ومش لازم تقتنع بالحاجة 100%.
وتابع محمد أنور: أنا كنت أقدر أعمل الفترة اللي فاتت دي 10 أفلام بطولتي، بس السينما بالذات نفسي أعملها زي النجوم اللي اتعلمنا منهم، هما ملغبطوش من بدايتهم، وأنا ممكن يبقى في ناس بتحبني بس أن ناس تشتري تذكرة وتدخلي سينما ده موضوع مختلف عن التلفزيون، فالمفروض إني أشتغل مع نجوم كبيرة أخد من شعبيتهم.
محمد أنور: فيلم مستر إكس مافيهوش إيحاءات
أما عن الانتقادات التي طالت فيلم مستر إكس، فعلق محمد أنور قائلًا: أنا شايف أن الموضوع بسيط وخد حجم أكبر من حجمه، هو أتعمل زي حملة كده على السوشيال ميديا للترويج لعمل تاني، ولكن فيلم مستر إكس عادي جدًا ومفيش فيه إيحاءات، هو لفظ أو اتنين في الفيلم كله ولكن متتاخدش كإيحاء أصلًا، لأن كلمة إيحاء يعني مشهد، ولكن في العادي لو عائلة دخلت الفيلم مش هتاخد بالها أن الكلمة تقصد حاجة، لأن مفيش حاجة تخدش الحياء.
وأضاف: فكرة التوزيع خارجي المسئول عنها شركة الإنتاج، وهما شايفين أن العيد هو أقل موسم بيدخل إيرادات في الخليج مش زينا، يعني في الخليج مفيش موسم والأعياد أقل الإيرادات، وأن الفيلم يبقى لوحده بعد الأفلام التانية.
