سميرة محسن عن اعتزالها: مش ندمانة واللي بيحترم نفسه يقعد وميضيعش تاريخه
كشفت الفنانة سميرة محسن تفاصيل اعتزالها وابتعادها عن مجال التمثيل على مدار الثلاث سنوات الماضية، مشيرة إلى أنها معترضة على زيادة عدد ساعات التصوير وآلية التصوير في الفترة الحالية.
تفاصيل اعتزال سميرة محسن
وقالت سميرة محسن خلال تصريحات خاصة لـ القاهرة 24: أنا مكتفية بإني بدّرس في المعهد، مش عاجبني الشغل مش عاجبني الممثل إن الممثل يقعد يصور 18 ساعة عشان رمضان فاضل عليه يومين، ولما نصور كل ده هياخدوا مننا إيه أداء؟ هياخدوا منه ازاي جفن ووش يعبر؟ ولا حاجة ولا يبقى فيه بحق وحقيقي، مش عاجبني إن ممثل يدخل يصور ومعاه 5 حلقات، هيمثل ازاي؟ هيعرف دوره ازاي؟ مهو الشخصيات بتطور ولها بداية ووسط ونهاية، هنعرف الوسط والنهاية من الـ 5 حلقات ازاي؟
وأضافت سميرة محسن: درسنا إن لازم الورق يبقى كله معانا، ده مش شغل تمثيل وطريقة متربيناش عليها، اللي بيحترم نفسه يقعد، ميضيعش تاريخه، كل الكويسين اعتزلوا، اللي بيتوقف بيحترم نفسه ويحترم الشغلانة أنا مش ببيع في بقالة أنا بعمل فن، ياما يبقى فن حقيقي يأما أقعد في البيت، أنا بمارس شغلتي في التدريس في المعهد معنديش أي وقت حاليًا.
وأردفت سميرة: معنديش إحساس بالندم إني اعتزلت وأنا مبسوطة جدًا إني احترمت نفسي والشغلانة واللي سافرت عشانها بعثة 4 أو 5 سنين عشان اتعلم، ولو بصيتوا دلوقتي على الوجوه الجديدة اللي بياخدوا أدوار مهمة بيبقوا من بره المعهد، خلاص اللي يحترم نفسه يقعد، اللي محتاج أكل عيش يشتغل، مش بفرض على الزملاء إنهم يعتزلوا، اللي محتاج يشتغل يشتغل، واللي مأمن نفسه وعنده إمكانيات يقعد.
وتابعت سميرة محسن: أنا مش قاعدة في البيت بشتغل في المعهد 6 أيام يعني مش حاسة بفراغ يجوز فيه بعض الفنانين اللي بيكملوا عشان ميحسوش بفراغ، اللي هوحشه يفتح اليوتيوب هيلاقي شغلي من فترة السبعينيات، أنا أول شغل اشتغلته كان مع حسين كمال وبعده كان عاطف الطيب يعني اشتغلت مع عظماء الفن، كل ما الممثل بيكبر بيدوله أدوار هايفة؛ لأن الكاتب بيكتب للشباب اللي زيه.
واختتمت سميرة محسن حديثها، أنها لن تعدل عن قرار اعتزالها؛ لأنها فكرت كثيرً به، حيث فكرت على مدار 6 أشهر قبل اعتزالها قبل 3 سنوات.
