ماندو العدل: مسلسل عملة نادرة كان ممكن يكون أحسن.. والداعية بالنسبالي حياة أو موت
تحدث المخرج ماندو العدل عن تجربته في عالم الإخراج وفشل فيلم الكبار للفنان عمرو سعد، وعن نجاح مسلسل الداعية للفنان هاني سلامة.
وقال ماندو العدل في تصريحات تليفزيونية: اشتغلت مساعد مخرج وأنا عندي 16 سنة وكان مسلسل ملك روحي للفنانة يسرا، وفي ناس كتير متعرفش عن فيلم الكبار والفيلم منجحش خالص ولا جاب إيرادات في السينما ولا نقديًا حد أتكلم عليه خالص، ووقتها حسيت بإحباط شديد.
وأضاف ماندو العدل: مسلسل الداعية كان بالنسبالي حياة أو موت، وعشان يبقى عندنا سيناريوهات كويسه لازم يكون عندنا حرية إبداع ميبقاش في محاذير رقابية كبيرة.. وفي أفلام من التمانينات مستحيل تتعمل دلوقتي، والمؤلف لازم يكون مثقف وقارئ وفي كتاب عندنا مبتقرأش كتابين على بعض ولا بيشوفوا أفلام.
ماندو العدل: هاني سلامة سألني اشمعنا أنا في الداعية.. وعملة نادرة نجح بشكل مقبول
وعن مسلسل الداعية ونجاحه، علق ماندو العدل: هاني سلامة سألني اشمعنا أنا في دور داعي سلفي، وهو اجتهد جدًا وجبت ليه ناس عشان تجويد القرآن واللغة العربية، ونجاح مسلسل الداعية فرحة لا تضاهي بالنسبالي.
وعن مسلسل عملة نادرة ونجاحه، قال ماندو العدل: تجربة مسلسل عملة نادرة حلوة، وكان ممكن يكون أحسن لو عدد الحلقات أقصر وكانت ظروفه صعبة، والمسلسل الـ 30 حلقة اللي بتدخله وأنت مش معاك الـ 30 حلقة ده مشكلة كبيرة جدًا في ضغط العرض وضغط رمضان، وهو نجح بشكل مقبول.
