عشت معاها 8 سنين في الجنة.. رسالة زوج مؤثرة لزوجته بعد مرور عام على وفاتها
عيشت معاها 8 سنين في الجنة، بهذه الكلمات المؤثرة، أحيا ناصر أحمد ذكرى وفاة زوجته بعد عام على فراقها، وتأثر مستخدمو مواقع التواصل الاجتماعي برسالة ناصر إلى زوجته في ذكرى وفاتها.
رسالة مؤثرة من زوج لزوجته بعد مرور عام على وفاتها
وأحيا ناصر أحمد ذكرى وفاة زوجته الأولى بكلمات مؤثرة للغاية في ذكرى وفاة زوجته قائلًا: أمي الله يرحمها كانت تقولها ما تقولي يا بنتي أنتي عاوزه أيه في الشقة نعملهولك تقولها أنا عاوزه ابنكم ومش عاوزه حاجه تانية، لا عمرها اشتكت من قلة الفلوس، ولا عمرها طلبت مني حاجة فوق طاقتي، كنت أقولها أنا هسافر علشان نعيش مرتاحين تقولي أنا مرتاحة وأنت جنبي، وأنا مش محتاجة منك حاجة غير أنك تكون معايا مش عاوزة حاجة غيرك.
وتابع: لما أكون غلطان واتعصب عليها تقولي، أنا آسفة عارفة إنك شغال في الحالات الحرجة والطوارئ، وبتشوف اللي محدش يقدر يتحمله فحقك إنك تتعصب، وأنا واجبي أني أهديك علشان انت بتتعب علشاني.
وتذكر ناصر أحمد بعض المواقف التي لا تنسى لزوجته في ذكرى وفاتها، قائلًا: من حنيتها على أخواتي وعيالهم لحد دلوقتي بيعيطوا عليها مش متخيلين إنها خلاص مبقتش موجودة، وقفت معايا في شغلي واستحملت كتير لحد ما بقينا رقم واحد، وكل دا بفضل ربنا ثم بفضلها عليا، لما عملت الحادثة كانت بقولها لو مش عاوزه تكملي معايا أنا مش هزعل، كانت بتقولي هو أنا لقياك في الشارع علشان أسيبك، وبعدين هو أنت تعيشني أجمل 7 سنين في حياتي، ومش عاوزني استحمل 5 أو 6 شهور.
ووصف ناصر أحمد زوجته بكلمات لا مثيل لها، قائلًا: مفيش حد نساها لأنها عمرها لا خذلت حد ولا زعلت حد ولا قالت كلمة وحشة في حق حد، كانت الجنة بتظهر في وشها لما تضحك، كانت العيد في كل عيد.
