مصطفى كامل: معرفش ترافيس سكوت ولا طقوسه ولازم أحترم آراء الناس المتدينة
علق الفنان مصطفى كامل نقيب المهن الموسيقية على الجدل المثار حول إلغاء تصريح حفل مؤدي الراب العالمي ترافيس سكوت، المقرر إقامته يوم 28 يوليو الجاري.
موقف مصطفى كامل من حفل ترافيس سكوت
وقال خلال مقطع فيديو نشره عبر حسابه على فيسبوك: البيان اللي صدر من النقابة كان موضح كل شيء، ومن ساعة ما توليت الأمر في النقابة واحنا واخدين قرار بإننا ضد المنع للصغير قبل الكبير، ضد المنع نهائي ولكن حاطين ضوابط ومعايير لإدارة الشأن ده، أقريناهم على مطربين بلدنا، وكل الناس شغالة ومرفضتش حفل خالص.
وأضاف مصطفى: جالي تليفون قالولي إن فيه شركة من الشركات المعتادة على التراخيص من داخل النقابة، ولجنة العمل واللوائح القانونية قالولي مفيش مشكلة ورخصنا، والترخيص طلع بالفعل، مكنتش أعرف ساعتها ترافيس سكوت ولا طقوسه ولا أي حاجة، وفيه ناس كتير متعرفوش وإعلاميين كمان، ولكن لجنة العمل قالولي يلا فأنا رخصت.
وأردف مصطفى كامل: حالة الدفاع المستميت من آراء الجماهير عمومًا عن وضعنا ومخاوف تحصل لأبنائنا سواء كانوا عرب أو أجانب هيروحوا الحفل ولما أقرأ حجم الخوف عند زملائي، والناس مرعوبة، ولما اجتمعنا شوفنا الفيديوهات اللي دايما بتشوفوها، وحسينا بمخاوف الناس.
وأضاف مصطفى كامل: نقابة المهن الموسيقية المنوط بيها الترخيص في حالة وجود أي حفل أجنبي، أنا ووزارة الثقافة والقوى العاملة المصرية، إحنا 3 جهات بنصدر الترخيص في حالة الحفلات دي، أنا ممنعتش ومرفضتش لغيره أساسا، ولكن كان لازم نستقرأ الوضع اللي حصل وبإجماع، عارف إن الشركة هتأمن حفلها زيها زي أي شركة ولكن لا بد من الالتزام بالموافقات الأمنية، أنا كجهة مختصة باستخرج تصاريح فقط معنديش أدوات حماية وأمن للحفل من أي شغب ولا أملك أدوات تنظيم، أنا جهة مانحة ترخيص فني فقط.
مصطفى كامل: لو الترخيص موجود والموافقات الأمنية جات إحنا كنقابة هنضرب تعظيم سلام
واختتم مصطفى كامل حديثه، قائلًا: لازم أحترم آراء الناس ومشاعر الناس والناس المتدينة سواء من إخوانا المسيحيين أو من المسلمين أو اليهود لازم أحترم كل الديانات، هو أنا قاعد في شركتي؟ أنا معايا مجلس إدارة محترم، البيان اللي صدر عن كل زميل واللي كانت المخاوف اللي جوايا جوا كل واحد فينا بردو، ولو لا قدر الله حصل حاجة هيتقالنا ياللي موتوا الناس، احنا كل اللي طلبناه وضع الاعتبارات الأمنية من حيث التنفيذ، فلو الترخيص موجود مع الشركة والموافقات الأمنية جات وكلنا كنقابة هنضرب تعظيم سلام من الجهة المنوط بها حماية هذا الحفل.
