رامي جمال: أجري أكثر من ناس كتير.. وأرفض الغناء في أفراح بها خمور وراقصات
كشف الفنان رامي جمال، رأيه في تقديم ألحان لمطربي مهرجانات، مؤكدًا أن هذا أمر مستحيل بسبب اختلاف الأذواق.
وقال رامي جمال في تصريحات تليفزيونية: مستحيل ألحن مهرجانات ومش ذوقي وأنا اتحاسب على اللي بعمله ومش عايز أقدم فن اعتذر عنه بعد كده في يوم من الأيام، حتى لو الدنيا جت عليا مش هغني مهرجانات وأستعين بأهلي.
وأكد رامي جمال، أنه من نجوم الصف الأول في التلحين ولكن ما زال أمامه الكثير من الأحلام ليحققها، مردفا: أنا من نجوم الصف الأول ومن وجهة نظر السوق والمتعهدين صف أول ومن وجهة نظري لسه كتير على اللي حلمت به.
واستكمل رامي جمال: بالنسبة للأجر بأخد أجر أكثر من ناس كتير وبحب يكون ليا أجر مختلف ولسه نجاحات كتير، وعمرو دياب نموذج والنجاح سهل الوصول له إنما النجاح متغير والمهم الاستمرارية.
رامي جمال أرفض الغناء في أفراح بها خمور وراقصات
كما أوضح رامي جمال،عن سبب رفضه الغناء في أماكن فيها شرب خمور أو تشاركه راقصات، مضيفًا: فكرة أني أغني في أماكن فيها شرب خمور برفض وعندي تحفظات على حاجات معينة وبرفض الرقاصات برضو ومتطلعش الرقاصة معايا في فقرتي في حفلة أو فرح.
وأضاف رامي جمال، أنه يفضل الاستحواذ على الاهتمامات لذلك لا يفضل وجود راقصات معه، قائلًا: لو اتعمل لي مفاجأة بوجود راقصة في فرح همشي، والرقص فن فيه ناس بتحبه ولكن متطلعش معايا أنا شايف آخد الاهتمام لوحدي.
ورد رامي جمال، على موقفه من تحريم الفن، قائلا: أنا مش شيخ وأنا شايف كل الشغلانات فيها الحلال والحرام وفي شبهات ممكن الواحد يتجنبها ومش عايز أحدد الشبهات عشان لو فيه زملاء بيعملوها، واللي يحلل ويحرم الشيوخ وشايف إن فني أقدمه لوحدي.
