فاروق فلوكس: غضبت من فؤاد المهندس لأنه رفض إعطائي راتبي عن إحدى المسرحيات
كشف الفنان فاروق فلوكس عن موقف أثار غضبه من الفنان الراحل فؤاد المهندس، مشيرًا إلى أنه مازال يحبه رغم هذه المواقف.
وقال فاروق فلوكس في تصريحات تلفزيونية: فؤاد المهندس ده حالة خاصة بالنسبة لي لغاية ما توفاه الله كنت بحبه رغم المواقف الكتير اللي عملها معايا مش حلوة.
وأضاف: مواقف كتير بس أنا هقولك واحد منها، كنت بشتغل في فرقة الريحاني بعمل رواية وبمثل بقالي سنتين الرواية والدنيا حلوة قوي.. جه قالي أنا هعمل رواية أنا وإنت وعوض وشويكار، وقالي خلص روايتك آخر أغسطس و1 سبتمبر هتكون معايا.
واستكمل: قولتله ازاي أسيب المسرحية دي؟ قالي هو كده أنا أستاذك وبقولك، وسيبت مسرح الريحاني وروحت عنده بناء على اتفاق إن أجري هيكون رقم معين، بعدها المؤلف تقاعس ومعملش الرواية أنا ماليش ذنب، إنت شيلتني من الفرقة وحاطتني عندك يبقى تديني مرتبي، إداني شهر واحد بس والشهر التاني صلاح يسري كان قاعد بقوله فين أجري؟ إداني ضهره، قولت لأستاذ فؤاد قالي ماليش دعوة، وطبعا أي حد مكاني كان هيزعل زعل الدنيا.
فاروق فلوكس يكشف رأيه في تحريم الفن
وسبق وكشف الفنان فاروق فلوكس، عن رأيه في تحريم الفن، وذلك في تصريحات سابقة لـ القاهرة 24، إذ قال: أي فنان بيطلع يقول الفن حرام، مش عايزينهم في مجال الفن وحرام وجوده وسطنا، اللي شايفين الفن حرام يمشوا ميقعدوش معانا، خليهم مقتنعين بالحلال والحرام، إنما أحنا كمهنة علشان نتصدى لهذا الأمر لازم نقدم أعمال جيدة ضد هذا الحلال والحرام.
