ضربها عشان كانت ماسكة إزازة فنيك.. المشدد 15 سنة للمتهم بقتل ابنة زوجته بأكتوبر
قضت محكمة جنايات الجيزة المنعقدة بالكيلو 10 ونصف اليوم السبت، بالسجن المشدد 15 سنة، على المتهم بقتل ابنة زوجته الطفلة مكة بمنطقة مساكن عثمان بأكتوبر بعد وصلة تعدٍ عليها، وارتطام رأسها بالحائط ما تسبب بوفاتها في الحال.
الحكم على المتهم بقتل ابنه زوجته
وفى وقت سابق انفرد القاهرة 24 بنشر التحقيقات في مقتل الطفلة مكة بأكتوبر، حيث استدعى رجال التحقيق المتهم بقتل الطفلة وجاءت أقواله كالآتي:
س: متى وأين حدث ذلك؟
ج: الكلام ده حصل يوم الأربعاء الموافق 7 سبتمبر 2022، في بيتي في الشقة اللي في مساكن عثمان.
س: من رافقك حينها؟
ج: أنا وقتها كنت لوحدي ومكنش معايا في البيت غير مكة الضحية وبنتي حياة.
س: صف لنا تحديدا كيفية ارتكابك الواقعة؟
ج: أنا لما نديت على مكة قلتلها هاتي يا مكة الدفاية بتاعتك عشان أفرشهالك على الفرشة بتاعتك فقالت لي حاضر، بس مجبتش حاجة ونفضتلي، فأنا نديت عليها بشخيط وزعيق من على باب الأوضة ولقيتها ساعتها ماسكة إزازة الفنيك وبتحاول تفتحها، روحت شاخط فيها ومزعق لها وقلت لها خدي هنا تعالي ولما جتلي قلتلها إنتي مش عارفة إن ده غلط وبيتمسح بيه الأرض وروحت ماسكها بايدي اليمين من كتفها الشمال بحيث إنها تلف جسمها، وأنا بزقها كده راحت وقعت واتخبطت في باب الأوضة فقامت دايخة ومش مظبوطة، فروحت واخدها دخلت بيها الحمام وغسلت لها وشها فقلت بالمرة أحميها عشان حسيتها مش فايقة وبعد كده وأنا بلبسها في الطرقة هدومها لقيتها بتقولي يا بابا أنا نفسي أنام فقلت لها خشي نامي راحت داخلة على فرشتي تنام وأنا سيبتها تنام على فرشتي.
