عنبر: بمر بظروف صعبة وعايشة يوم في ويوم مافيش.. جيلنا اتظلم وفي نجوم ركنوهم وقعدوهم في البيت
كشفت الفنانة عنبر أن جيلها تعرض لظلم كبير، بسبب تجاهل وعزوف المنتجين عنهم، موضحة أنها مرت بظروف قاسية بسبب ابتعادها عن الفن 5 سنوات، مؤكدة أن هناك نجوما كِبارا مقيمون بمنازلهم ولا يعملون في الفن، بعد أن وهبوا حياتهم للفن.
وتحدثت عنبر عن تعرضها للظلم، لقلة مشاركتها في أعمال فنية، إذ قالت في تصريحاتها لـ القاهرة 24: في ظلم كبير بيقع على جيلنا، جيلنا اتظلم وفي أسماء ونجوم كبار ركنوهم وقعدوهم في البيت، تاريخها كله راح على الأرض، تعب السنين راح، المنظومة كلها اتقلبت وبقت مختلفة، على حساب مين أنا معرفش.
عنبر تشكو: بمر بظروف صعبة لقلة عملي
وتابعت عنبر: مسألة اختيار النجوم مش بعدد الفلورز على التيك توك، المسألة بالتاريخ، في فنانين عاملين حاجات غريبة على التيك توك، دي مش تركيبتي ولا هعرف أعمل زيهم، المقياس حاليًا بقا من خلال الفلورز مش بالتاريخ، والدليل مشاركات البلوجرز في الأعمال الفنية، الأجيال الجديدة من المخرجين صغيرين بيتقال إنهم ميعرفوش الفنانين القدام الحقيقة دي جملة سخيفة، جبتوا الناس البلوجرز منين وتاريخهم فين، والشللية منتشرة جدًا، والعلاقات الاجتماعية.
وأضافت عنبر: الفنان له مصاريف خاصة، ومتطلبات معينة، وبمر بظروف مش حلوة، زوجي ممثل زيي ونفس شغلتي، بمر بظروف صعبة زي باقي الناس بسبب الغلاء، أنا بني آدمة وعندي بيت وعندي حياة ولو معايا فلوس أنا وجوزي فخد من التل يختل، وأنا قعدت 5 سنين بدون شغل، ومش هعرف اشتغل حاجة تاني غير في الفن، الحياة ماشية لكن مش زي ما أنا عايزة، بعيش يوم فيه ويوم ما فيش ودا لا يقلل مني عايشة زي الناس العادية.
واستكملت عنبر: أنا بحترم النجوم اللي أمنوا حياتهم بمشاريع تانية بعيدة عن الفن، لكن أنا معرفتش أعمل كده، وإحنا مهنتنا مفيهاش صاحب.
